Bıyl zeınetkerlermen qosa jaqynda ǵana jasaqtalǵan "A" korpýsyna kiretin memlekettik qyzmetshilerdiń de jalaqylary ósedi.

Tek sheneýnikterdiki áldeqaıda kóp, 50 paıyzǵa kóterilmek. Bul jemqorlyqty joıý úshin jasalyp otyrǵan jospar. Alaıda, halyq pen sarapshylar "aılyǵy eselengen sheneýnikter endi para almaıdy, degenge senbeı otyr. Óıtkeni, sińisip ketken bul júıeni buzý úshin zań men jazany qatańdatý kerek, deıdi turǵyndar.

"A" korpýsyndaǵy sheneýnikter úshin kele jatqan jylqy jylynyń jemisti bolatyn túri bar. Jańa jyldan bastap olardyń jalaqysy birden elý paıyzǵa kóbeımek.

Al halyq "elıta" dep atap júrgen "A" korpýsyna kimder kiredi? Eń aldymen Prezıdent isteri basqarmasy, esep jáne ortalyq saılaý komıtetteri, onan soń Premer-mınıstrdiń kanselárıasy, oblys ákimi apparatynyń jetekshileri men qala, aýdan ákimderi jáne taǵy basqalary. Iaǵnı, kileń basqarýshylar. Elimizde osyndaı 1124 adam bar.

Olar bıyl synaq tapsyryp, biliktilikterin dáleldep shyqty. Soǵan sáıkes tabatyn tabystary da jaman emes.Al prezıdent aıtqan ózgeris engiziletin bolsa, jaǵdaılary bylaısha ózgermek. "A" korpýsyndaǵylardyń ortasha jalaqysyn máselen 200 myń teńge dep alsaq, 1-qańtardan bastap aılyqtary 300 myń teńgege deıin joǵarylaıdy. 50 paıyzdyq ústeme,ıaǵnı 100 myń teńge.

"A" korpýsyna qatysy joq, saıası tulǵalar bolsa jalaqynyń joǵarylaýy - jemqorlyqqa qarsy birden-bir dárý bolady dep otyr.

"Jaqsy bir sóz esime túsip tur. Eger tártip saqshysy men dárigerlerdiń qarny toq bolmasa, memlekettiń irgesi berik bolmaıdy degen",- deıdi QR Tótenshe jaǵdaılar mınıstri Vladımır Bojko.

Memlekettik qyzmet isteri jónindegi agenttik basshysy Álıhan Báımenov úshin de sheneýniktiń qarny toq bolmasa, jemqorlyqpen kúresý ońaı bolmaıdy.

"Álemdik tájirıbe kórsetkendeı memlekettik qarjyny jumsaý týraly ınvestısıalar, memlekettik satyp alýlar týraly belgili bir deńgeıde jalaqysy bolmasa jemqorlyqpen kúresý qıyn.Dese de, bul jemqorlyqtan arylýdyń bir faktory", - deıdi QR Memlekettik qyzmet isteri agenttiginiń tóraǵasy Álıhan Báımenov.

Jalaqynyń joǵarylaýy jemqorlyqty jeńe almaıdy deıtinder de kóp.

"Jemqorlyqtyń aldyn alý tek qana sheneýnikterdiń jalaqysyn kóterýmen sheshiletin másele emes, birinshiden, ekinshiden, endi onsyz da jalaqysy joǵary toptyń jalaqysyn jartylaı ósirý qalǵandarynyń jalaqysyn ósirmeı turyp ósirý bul jerden qısyndy kórip otyrǵan joqpyn", - deıdi saıasattanýshy Rasýl Jumaly.

Qarapaıym halyq ta bul joldyń jemqorlyqty joıatynyna senbeıtin bolyp shyqty.  Turǵyndardyń pikirinshe, alyp úırenip qalǵan qol ala beretin sekildi.

"Bul bastama rasynda da qoǵam bolyp kúrese almaı jatqan jemqorlyqqa tusaý salýy múmkin. Kezinde menen de para suraǵandar bolǵan. Bul - jaqsy betburys. Kóptik etpeıdi, ústine 50 paıyz qosylady. Para suraǵandar kezdesedi, biraq oǵan jol berilmeıdi", - deıdi memlekettik qyzmette jumys isteıtin Momysh Mahmetov. .

Aıta keteıik, osyǵan deıin elimizde sýdıalardyń da jalaqysy 60 paıyzǵa kóterilgen bolatyn. Sonan jemqorlyq joıylady dep josparlanǵan. Biraq, soǵan qaramastan sýdıalardyń jyl saıyn úsh-tórteýi paramen ustalyp, al on shaqtysy qyzmetinen qýylsa, taǵy qyryq shaqtysy tártiptik jazaǵa tartylady eken. Bul jańashyldyqtyń endi "A" korpýsynda qandaı sıpat alatyny tek ýaqyttyń enshisinde.

Derekkóz: news.nur.kz