İshki ister mınıstrliginiń Almaty akademıasynda Batys Qazaqstan oblysynda týǵan kýrsant óz-ózine qol jumsady. Bul týraly Ýralskaıa nedelá basylymy habarlady.

Saıt málimetinshe, oqıǵa 13 jeltoqsanda bolǵan. İİM akademıasy Salamattyń ata-anasyna balasynyń óz-ózine qol jumsaǵanyn habarlaǵan. 15 jeltoqsan kúni Salamattyń denesi Oral qalasyna jetkizildi. 16 jeltoqsanda Aqjaıyq aýdany Shabdarjap aýylynda jerlendi.

Basylym jýrnalıseri Salamattyń anasy Bekzat Imanǵalıevamen habarlasqan. Onyń aıtýynsha, Salamat qaıtys bolǵanǵa deıin ata-anasynan jıi-jıi aqsha aýdarýdy surap júrgen. Sońǵy úsh aıda ádettegiden de kóp aqsha suraǵan. 

Salamat ólimi aldynda saǵat 11.00-den 17:00-ge deıin aǵasynan 300 myń teńge jiberýin suraǵan. Alaıda aǵasynyń aýylynda ınternet nashar istegendikten, habarlama kesh jetken. Salamattyń sońǵy habarlamasy 16:31-de kelgen. Ol aǵasyna "men kettim" dep jazyp, beldiginiń jáne óziniń sońǵy sýretin jibergen.

– 2020 jyldyń 13 jeltoqsanda kýrsant Salamat Ótegenov asylyp qaıtys bolǵanyn habarlaımyz. Atalǵan derek boıynsha Almaty qalasy polısıa departamenti ózindik qaýipsizdik basqarmasy qylmystyq kodekstiń 105-baby 1-bóligi boıynsha sotqa deıingi tergeý júrgizip jatyr. Sonymen qatar qyzmettik tergeý barysynda akademıa qyzmetkerleri men kýrsanttary tarapynan zańsyz is-áreketter anyqtalǵan joq, – dedi İİM akademıasyndaǵylar.

OQI OTYRYŃYZ: Kýrsant qaıtys bolǵan akademıanyń bastyǵy qyzmetinen bosatyldy