Maqan Esbolatov atyndaǵy Almaty İİM akademıasynyń kýrsanty Salamat Ótegenovtiń qaza bolýyna baılanysty, Almaty qalasynyń polısıa departamenti QR QK 105-baby "Ózin-ózi óltirýge deıin jetkizý" boıynsha sotqa deıingi tergeý júrgizýde, onyń barysynda qaza tapqan adamnyń týystary baıandaǵan barlyq dálelder tekseriledi, dep habarlady  İshki ister mınıstrliginiń baspasóz qyzmeti.

Oqý ornyna İshki ister mınıstrliginiń kadr saıasaty jáne ózindik qaýipsizdik departamentteriniń basshylyǵy men jaýapty qyzmetkerlerinen arnaıy top jiberildi.

Tekserý qorytyndysy boıynsha İİM-de tártiptik komısıa otyrysy ótti.

"İshki ister mınıstriniń buıryǵymen senip tapsyrylǵan bólimshede jumysty uıymdastyrýǵa tıisti baqylaýdyń joqtyǵy úshin atqaryp otyrǵan laýazymdarynan akademıa bastyǵy O.H.Smaıylov bosatyldy, sondaı-aq onyń tárbıe-ıdeologıalyq jáne kadr jumysyna jetekshilik etetin orynbasary bosatýǵa usynyldy. Sonymen qatar, Akademıanyń taǵy 16 jaýapty qyzmetkeri qatań tártiptik jaýapkershilikke tartyldy, olardyń 5-i  atqaryp otyrǵan laýazymdarynan bosatyldy" delingen baspasóz qyzmeti taratqan habarlamada.

Akademıanyń oqý prosesin, turmystyq jaǵdaılaryn, moraldyq-psıhologıalyq ahýalyn, qarjy-sharýashylyq qyzmetin keshendi tekserý taǵaıyndaldy. Oqý ornyna mınıstrliktiń ishki aýdıt, kadr saıasaty jáne ózindik qaýipsizdik departamentteriniń qyzmetkerleri jiberildi.

Vedomstvoda atap ótkendeı, mınıstr Erlan Turǵymbaevtyń tapsyrmasy boıynsha osyndaı tekserýler 2021 jyldyń 1 toqsanynda İİM-niń barlyq oqý oryndarynda júrgiziledi.