Bilim jáne ǵylym mınıstrligi aýyldyq eldi-mekenderdegi kolej stýdentteri dástúrli formatta, al joǵary oqý oryndarynda oqý prosesi aralas formatta ótetinin málimdedi. 

Mınıstrlik resmı saıtynyń habarlaýynsha, ekinshi semestrden bastap qazaqstandyq kolejderde oqý prosesi dástúrli, qashyqtan jáne aralas formatta jalǵasady.

Al aýyldyq jerlerde jáne shaǵyn qalalarda ornalasqan 97 kolej óz stýdentteri úshin oqýdy dástúrli formatta uıymdastyrady. Sondaı-aq QR İİM men QR QM janyndaǵy 14 kolejdiń stýdentteri oqý oryndarynda oqıdy.

"Qalǵan kolejderde birinshi kýrs stýdentteri úshin, atap aıtsaq stýdentteriniń jalpy sanynyń shamamen 31%-y úshin oqytý aralas formatta uıymdastyrylady.

Birinshi kýrs stýdentteri úshin barlyq sanıtarlyq-epıdemıologıalyq talaptardy saqtaı otyryp, oqytý pánderiniń 70%-y dástúrli formatta jáne 30%-y qashyqtan ótkiziledi. TjKB uıymy oqý jumys josparlaryna sáıkes shtattyq jáne qashyqtan oqytý formattarynda oqytýdy ótkizý úshin pánder tizbesin derbes aıqyndaıtyn bolady.

Aýdıtorıalyq sabaqtardyń uzaqtyǵy 45 mınýttan aspaıdy, kolej ákimshiligi ıkemdi keste qurady. Kabınetterde úzilister arasynda jáne sabaqtan soń sanıtarlyq tazalaý jumystary júrgiziledi.

2-4 kýrs stýdentteri aralas formatta oqıdy. Tehnıkalyq, tehnologıalyq, agrarlyq baǵyttar boıynsha oqıtyn stýdentter úshin sabaqtar qashyqtan, zerthanalyq jáne praktıkalyq sabaqtar, óndiristik oqytý jáne kásiptik praktıka dástúrli formatta uıymdastyrylatyn bolady. Qorytyndy atestattaý da shtattyq rejımde ótedi" delingen mınıstrlik taratqan habarlamada.

Sondaı-aq pedagogıkalyq, ekonomıkalyq, IT, áleýmettik jáne gýmanıtarlyq mamandyqtar boıynsha 2-4 kýrs stýdentteri oqýdy qashyqtan oqý formatynda jalǵastyrady.