«Nur Otan» partıasy Tóraǵasynyń birinshi orynbasary Baýyrjan Baıbek jelide arnaıy jazba jarıalady. Ol óz jazbasynda Nur Otan saılaýaldy baǵdarlamasyn qalaı júzege asyratynyna toqatalyp, daýys bergen azamattarǵa alǵysyn jetkizdi.

«Qurmetti dostar! Ortalyq saılaý komısıasy parlamenttik saılaýdyń qorytyndy nátıjesin jarıalady. «Nur Otan» partıasy 71,09% daýys jınady. Barlyq deńgeıdegi máslıhattar saılaýynda da biz aıqyn jeńiske jettik.

Elbasy, partıa Lıderi Nursultan Nazarbaev atap ótkendeı, «Nur Otan» partıasynyń basty maqsaty – halyqtyń turmysyn jaqsartý jáne eldigimizdi nyǵaıta berý. El bolyp birige bilsek, alynbaıtyn asý joq. Basymyzǵa túsken qıyndyqtardy biz árdaıym birge eńserip, jetistikterge birlese jetemiz».

Bizdiń «Ózgerister joly: Ár azamatqa laıyqty ómir!» atty saılaýaldy baǵdarlamamyz – elimiz ben óńirlerdi aldaǵy 5 jylda damytýdyń daıyn jospary. Ol Elbasynyń 5 ınstıtýsıonaldyq reformasynyń baǵdaryn jalǵastyrady jáne Memleket basshysy Qasym-Jomart Toqaevtyń Qazaqstan halqyna Joldaýynda qoıylǵan mindetterdi qamtıdy.

«Nur Otan»-nyń baǵdarlamasy – egjeı-tegjeıli eseptelgen, qarjylyq jáne naqty resýrstarmen qamtylǵan sharalar. Alǵash ret josparlaý tásili de ózgerdi. Munda salalyq emes, strattyq qaǵıdat negizge alyndy. Bul rette naqty áleýmettik toptardyń múddesi basty nazarda bolady.

Elbasy aıtqandaı, endi partıamyz saılaýaldy ýádelerdiń jáne Memleket basshysynyń pandemıa saldary men ekonomıkalyq daǵdarysty eńserý boıynsha qoıǵan mindetteriniń barlyq deńgeıde iske asyrylýyn qamtamasyz etýi tıis. Aldymyzda atqaratyn aýqymdy jumys bar», - dep jazdy partıa Tóraǵasynyń birinshi orynbasary.

Sondaı-aq, ol saılaýǵa qatysyp, partıaǵa senim bildirgenderge alǵysyn jetkizdi.
«Dostar! 10 qańtarda saılaý ýchaskelerine kelip, «Nur Otan» partıasyna daýys berý arqyly jasampazdyq pen Qazaqstannyń órkendeý jolyn tańdaǵan barsha azamatqa taǵy da alǵys aıtamyn.

Birlese otyryp, saılaýaldy ýádelerimizdiń bárin de júzege asyratynymyzǵa senimdimin! Qıyndyqty eńserip, jeńiske birge jetemiz!», - dep túıindedi Baýyrjan Baıbek.