Nursultan Nazarbaev "Edınaıa Rossıa" búkilreseılik saıası partıasynyń tóraǵasy, Reseı Federsıasynyń qaýipsizdik keńesi tóraǵasynyń orynbasary Dmıtrıı Medvedevpen telefon arqyly sóılesti. Bul týraly elbasy.kz saıty habarlady. 

Dmıtrıı Medvedev elbasyny parlament májilisi depýtattarynyń kezekti saılaýynda "Nur Otan" partıasynyń aıqyn jeńiske jetýimen quttyqtady. Sondaı-aq ol daýys berý nátıjeleri jalpyulttyq senimdi jáne partıanyń eldi órkendetýge baǵyttalǵan strategıalyq baǵdaryn qoldaıtynyn kórsetkenin atap ótti. 

Elbasy saıtynyń málimetinshe, Nazarbaev Medvedevke jyly lebizderi úshin rızashylyǵyn bildirip, Qazaqstan-Reseı strategıalyq jáne odaqtastyq qatynastarynyń rýhy men mazmunyna saı keletin "Nur Otan" men "Edınaıa Rossıa" partıalarynyń arasyndaǵy yntymaqtastyq joǵary deńgeıde ekenine toqtalǵan.

Taraptar aldaǵy ýaqytta da eki eldiń basty partıalary arasyndaǵy ózara is-qımyldy odan ári tereńdetý jáne keńeıtý jóninde pikir bildirgen.