Toqaev  "Samuryq-Qazyna" UÁQ" AQ basqarma tóraǵasy Ahmetjan Esimovti qabyldady. Bul týraly akorda.kz saıty habarlady. 

Kezdesý barysynda prezıdentke "Samuryq-Qazyna" aksıonerlik qoǵamynyń 2020 jyly atqarǵan jumystarynyń aldyn ala qorytyndylary týraly baıandaldy.

Jahandyq daǵdarys pen pandemıaǵa qaramastan holdıń byltyr óz qyzmetin tabysty atqarǵan. Qorǵa qarasty kompanıalar qyzmetkerleriniń jappaı qysqarýyna jol bermegen. Qor kompanıalary aktıvteriniń ósimi 800 mıllıard teńgege jetken.

Akorda.kz saıtynyń málimetinshe, sońǵy 3 jylda "Samuryq-Qazyna" ulttyq ál-aýqat qory zaımdardy óteý úshin ulttyq qorǵa 554 mıllıard teńge qarjy aýdarǵan. Holdıńke qarasty kompanıalardyń bıznes-úderisterin sıfrlyq transformasıalaý nátıjesinde 171 mıllıard teńge paıda túsken.

Sonymen qatar memleket basshysyna otandyq taýar óndirýshilerdi qoldaýǵa baǵyttalǵan aýqymdy jumystar týraly aqparat berildi. 2018-2020 jyldardyń qorytyndysyna sáıkes satyp alýlar boıynsha únemdelgen qarjy 410 mıllıard teńge boldy.

Atqarylǵan aýqymdy jumystardyń nátıjesinde "Samuryq-Qazyna" holdıńiniń kredıttik reıtıńi BB+/B "Turaqty" deńgeıde ekenin halyqaralyq Standart & Poor`s reıtıń agenttigi naqtylady.

Ahmetjan Esimov "QazMunaıGaz" ulttyq kompanıasy munaı baǵasynyń edáýir arzandaǵanyna jáne OPEC+ kompanıasynyń shekteýlerine qaramastan, qarjylyq reıtıńte oń kórsetkishin saqtap qalǵanyn jetkizdi. "Qazaqstan Temir Joly" aksıonerlik qoǵamy sońǵy 6 jylda birinshi ret ótken jyldy qarjylyq turǵydan paıdamen aıaqtaǵan. "Qazatomónerkásip" UK" aksıonerlik qoǵamy aktıvteriniń quny IPO-ǵa (2018 jyly) shyǵarylǵaly beri 2,1 mıllıardtan 5,1 mıllıard AQSH dollaryna deıin kóterilgen. "Samuryq-Energo" aksıonerlik qoǵamynyń qaryzy 100 mıllıard teńgege azaıyp, qarjy turaqtylyǵynyń "qyzyl" aımaǵynan "jasyl" aımaǵyna ótti.  

Kezdesý sońynda Qazaqstan prezıdenti "Samuryq-Qazyna" UÁQ" AQ basqarma tóraǵasyna birqatar naqty tapsyrma berdi.