Shyǵys Qazaqstan oblysynda jedel járdem kóligi jol apatyna tústi. Bul týraly oblystyq polısıa departamentiniń baspasóz qyzmeti habarlady.

Departament málimetinshe, oqıǵa 3 aqpan kúni saǵat 19:25 shamasynda bolǵan. "DAF" markaly júk kóliginiń 29 jastaǵy júrgizýshisi Óskemen qalasynan Semeıge qaraı jol tartqan. Burqasyn men kóktaıǵaqtyń kesirinen rúldi basqara almaı, joldyń qarsy betindegi "GAZ-A31R23" markaly jedel járdem kóligimen soqtyǵysqan.

"Jedel járdemniń 1972 jáne 1979 jyldary týǵan 2 jolaýshysy aýyr dene jaraqatynan oqıǵa ornynda qaıtys boldy. Jedel járdemniń 44 jastaǵy júrgizýshisi dene jaraqatymen Semeı qalasynyń aýrýhanasyna jetkizildi" delingen habarlamada.

Oqıǵa boıynsha qylmystyq kodekstiń 345-baby 4-bóligi ("Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy,  abaısyzda eki nemese odan da kóp adamnyń ólimine ákep soqqan is-áreket") boıynsha sotqa deıingi tergeý bastaldy. Birqatar sot saraptamalary taǵaıyndaldy. Sotqa deıingi tergeý jalǵasyp jatyr.