Prezıdent Qasym-Jomart Toqaev qarjy mınıstri Erulan Jamaýbaevty qabyldady, dep habarlady Aqorda saıty.

Saıt málimetinshe, Jamaýbaev mınıstrliktiń 2020 jyly atqarǵan jumystarynyń nátıjeleri, prezıdent joldaýynda qarjy salasyna qatysty aıtylǵan tapsyrmalarynyń oryndalý barysy, vedomstvonyń aldaǵy negizgi mindetteri jaıynda baıandaǵan.

Mınıstr búdjettiń teń bólinýin qamtamasyz etý, salyq-keden ákimshiligin sıfrlandyrý, kóleńkeli ekonomıkanyń kólemin azaıtý, memlekettik aktıvterdi basqarýdyń tıimdiligin arttyrý, satyp alý men memlekettik aýdıt júıelerin jetildirý týraly aıtty.

Memleket basshysy Toqaev úsh jyldyq respýblıkalyq búdjetti ońtaılandyrýǵa jáne sapaly ázirleýge qatysty birqatar tapsyrma berdi. Salyq-keden ákimshiligin sıfrlandyrý jumysyn tolyq oılastyryp, belgilengen merzimde oryndaýdyń mańyzdylyǵyn atap ótti.

Prezıdent memlekettik satyp alý týraly zańnamany jetildirý qajettigine toqtaldy. Onyń aıtýynsha, usynylyp otyrǵan barlyq jańa zańnamalyq bastamalar ábden pysyqtalýy tıis.

Qasym-Jomart Toqaev memlekettik aýdıtorlyq qyzmet tıimdi bolýy qajet jáne resmı organdardyń negizsiz búdjettik shyǵyndaryn anyqtap, onyń aldyn alý sharalaryna basa mán berýi kerek dep sanaıdy.