El azamattary kólikti tıisti qujattaryn alyp júrmeı-aq, tek jeke kýálikpen júrgizýine múmkindik beretin jańa norma 13 aqpannan bastap kúshine enedi. Bul týraly ishki ister mınıstri Erlan Turǵymbaev málim etti.
"Memleket basshysy "Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly" Zańǵa qol qoıdy. Jańa zań aǵymdaǵy jyldyń 13 aqpanynan bastap kúshine enedi. Buryn Qazaqstanda júrgizýshi qujattarynyń biriniń joqtyǵy úshin eskertý (eger alǵash ret bolsa) nemese 5 AEK aıyppul qarastyrylǵan bolatyn. Endi júrgizýshilerge kólikti júrgizgen kezde ózimen birge tek bir ǵana qujat – jeke basyn kýálandyratyn kýálikti alyp júrý jetkilikti" delingen mınıstrdiń facebook-tegi paraqshasynda.
Mınıstr málimetinshe, Qazaqstanda berilgen júrgizýshi kýáligin, kólik quralyn tirkeý kýáligin, saqtandyrý polısin, sondaı-aq tehnıkalyq baıqaýdan ótkenin rastaıtyn qujatty polıseı planshet arqyly tekseredi. Al ınternet jelisine qoljetimdilik joq eldi mekenderde jáne tas joldarda tekserý radıobaılanys arnalary arqyly júzege asyrylatyn bolady.
Jańa normalardyń qazaqstandyq júrgizýshi kýáligi joq sheteldikterge jáne Qazaqstanda tirkelmegen kólik basqarýshylaryna qatysy joq.
"Avtokólikti júrgizýshi qujattarynsyz basqarýdyń osyndaı múmkindigi Grýzıa, Ýkraına, Polsha, Latvıa, Lıtva sıaqty memleketterde bar, ol elderde de ulttyq zańnamaǵa tıisti ózgerister engizilgen" dep jazdy mınıstr.
