Almaty turǵyny Facebook-tegi paraqshasynda polıseılerdiń áreketine narazy ekenin jazdy. Óıtkeni belgisiz eki er adam oǵan shabýyl jasaǵan, keıin polısıa qyzmetkerleri shabýyldaýshylardy ustaı sala bosatyp jibergen. Osylaısha, olardy qaıta izdeýge týra kelgen. Bul týraly Qamshy tilshisi Tengrinews.kz saıtyna silteme jasap habarlaıdy. 

Onyń aıtýynsha, shabýyl túngi saǵat bir shamasynda eki dosymen dúkenge bara jatqanda bolǵan.

"Dúken mańynda eki deneli er adam sur rúkzaktaǵy jas jigitten bir nárse talap etip turdy. Olardyń biri bizdi kórip men jaqqa qaraı júgirdi, biz kólikke qaraı bet aldyq, ekeýi artymyzdan kele jatyr. Rúkzaktaǵy jigit basqa jaqqa qashyp ketti. Kólikke júgirip kirdik, ol otalǵansha jańaǵy deneli er adamnyń biri artqy esikti ashty. Men júrip bara jatqanda artqy terezemdi syndyryp úlgerdi", deıdi zardap shegýshi.

Osylaısha, olar polısıa shaqyryp, buzaqylardy ustaýǵa kómektesken.

– Aldymen patrúlder olardy jibere saldy. "Bul olar emes, mynalar saý" dedi. Biz olardy osy ýaqyt boıy baqylaǵanymyzdy túsindirýge tyrystyq. Biraq bizben sóılesip jatqanda, ana ekeýi qashyp, ary qaraı qyzyq boldy: men patrúlge otyrdym da olardy izdestire bastadyq. Júk kóliginiń artynan taptyq, jaqyndap baryp, qýyp, 20 mınýttan keıin ustaldy. Taǵy qaıtalaıyn: olar birden toqtatyp, ustap, alyp ketýine bolar edi. Biraq bizdiń polısıa ońaı jol izdemeıdi. Bireýi ǵana ustaldy, 35-40-ta sıaqty, – deıdi almatylyq.

Keıin ustalǵan adam 2001 jylǵy Ózbekstan azamaty ekeni belgili bolǵan.

– AİİB-ǵa bizden keıin ekinshisi keledi, kóshede turǵanbyz, ol kedergisiz bólimge kirdi. Polıseıler bizge ustalǵan adam ızolátorǵa qamalǵanyn aıtty, al ekinshisi keldi degende eshkim eshteńe istemedi.

Ary qaraı ne boldy? Biz aryz jazdyq, sodan keıin nege ekeni belgisiz túsinik hat jazdyq. Olar erteń ýchaskelik polısıa qyzmetkeri qońyraý shalyp, barlyq máseleni sheshetinin aıtty. Biz 3 kún kúttik. Dúısenbige deıin eshteńe ózgermese, men prokýratýraǵa jazamyn, – dedi jábirlenýshi.

Ol keltirilgen zalaldyń óteletinine senbeıtinin jáne kólik áınegin ózi salatynyn, biraq polısıa qyzmetkerleriniń áreketine narazy ekenin jazdy. 

Alataý aýdandyq polısıa basqarmasynyń basshysy podpolkovnık İlıas Ómirserikov almatylyqtyń jazbasyna túsinik bere otyryp, bul is boıynsha tekserý júrip jatqanyn aıtty.

"Quqyqbuzýshy – Qazaqstan Respýblıkasynda júrý erejelerin buzǵan Ózbekstan azamaty, ony kóshi-qon qyzmetindegiler Almaty PD qabyldaý-taratý ornyna qamady. Ol sizge qatysty zańsyz áreketter jasaǵany úshin mindetti túrde qoldanystaǵy zańnamaǵa sáıkes jaýapqa tartylatynyn habarlaımyz" dep sendirdi Ómirserikov.

Onyń aıtýynsha, materıal Alataý aýdandyq PB jergilikti polısıa bóliminde.