10 aqpan kúni Shyǵys Qazaqstan oblysynda saıahatshy qar kóshkininiń astynda qalyp qoıyp qaza tapty. Bul týraly oblystyq tótenshe jaǵdaılar departamentiniń baspasóz qyzmeti habarlady.

Departamenttiń málimetinshe, oblys ortalyǵynan kelgen alty saıahatshy Rıdder qalasy Úlbi ózeniniń mańaıyndaǵy Serjıha taýynda syrǵanap júrgen. Kenetten taýdan kóshkin júrip, demalýshylardyń birin qar basyp qalǵan.

– Oblystyq tótenshe jaǵdaılar departamenti jedel qutqarý jasaǵynyń qutqarýshylar toby kınologtarmen birge Evrokopter-145 tikushaǵymen dereý kómekke  shyqty. Quramynda 5 adam bar ekinshi top jol talǵamaıtyn kólikpen Óskemennen shyqty. Rıdder qalasynan qutqarýshylar men 4 volonter qarda júrgishpen qosymsha jumyldyryldy, – dedi tótenshe jaǵdaılar mınıstrliginiń resmı ókili Talǵat Ýálı. 

Saıt málimetinshe, kúnniń bultty bolýy men tútek borannan tikushaq saǵat 16:23-te májbúrli túrde qonǵan. Osy ýaqytta saıahatshylar baılanysqa shyǵyp, qar astynda qalǵan 1979 jyly týǵan er adamnyń denesin alyp shyqqanyn habarlaǵan.

11 aqpanda 8 volonter, 2 qutqarýshy, 1 krımınaldyq polısıa sarapshylarynan turatyn top jáne 3 saıahatshy qaza bolǵan adamnyń denesin túsirý úshin taýǵa ketken.

Buǵan deıin, tótenshe jaǵdaılar departamenti qutqarýshylary birneshe kún qatarynan turǵyndarǵa taýdaǵy kóshkin qaýpi týraly eskertý jasaǵan.