AQSH prezıdenti Djo Baıden Qytaı tóraǵasy Sı Szınpınmen telefon arqyly sóılesip, Shyńjańdaǵy etnıkalyq qazaqtar men uıǵyrlar máselesin kóterdi. Bul Baıdenniń qyzmetke kiriskennen keıingi Qytaı basshysyna soqqan alǵashqy qońyraýy.

Aq úı jarıalaǵan aqparatqa sáıkes, Baıden "májbúrleıtin jáne ádiletsiz ekonomıkalyq tájirıbeler", "Gonkongtegi repressıa" jáne qazaqtar men uıǵyrlar ómir súretin "Shyńjańdaǵy adam quqyǵynyń buzylýy" máselesin kótergen.

"Sondaı-aq, áńgimelesý barysynda eki el basshysy COVID-19 pandemıasyna qarsy qalaı kúresý kerektigin talqylady" dep jarıalady Aq úı. Sonymen qatar, Baıden Sı Szınpınge klımattyń ózgerýine qarsy kúresý jáne ıadrolyq qarýdyń taralýyna jol bermeý úshin birge jumys jasaǵysy keletinin bildirgen.

Burynǵy prezıdent Donald Tramp Qytaıǵa keden salyǵyn engizgen. Baıden ákimshiliginiń joǵary laýazymdy adamy NBC News-ke qazirgi ýaqytta kedendik baj salyǵyn taǵy da kóterý jospary joq ekenin aıtty, biraq "Qytaıǵa qatysty saýda saıasatynda ózgerister bolady" dep málimdedi.