Belarýs prezıdenti Aleksandr Lýkashenko Reseı prezıdenti Vladımır Pýtınmen kezdeskennen keıin "eki el qosylýy múmkin" degen áńgimege pikir bildirdi, dep jazady BelTA saıty.

– Biz egemen jáne táýelsiz elmiz. Búginde álem ózgergeni sonsha, Belarýs Reseı quramyna kirýi kerek nemese Reseı Belarýs quramyna kirýge tıis, ne bolmasa ortaq basqarý organyn qurý arqyly eki el qalaı da birigýi qajettigi týraly áńgime júrip jatyr. Bul baǵytta jumys isteýdiń ózi aqymaqtyq bolar edi.

Birinshiden, bul múlde kerek emes. Óıtkeni egemen el retinde biz Reseı Federasıasynyń jekelegen aýmaǵyndaǵy qarym-qatynastan da berik qarym-qatynas júıesin qura alamyz, – degen ol Belarýs pen Reseı túrli baǵytta teń dárejede damyp kele jatqandyqtan júıe qura alatynyna senimdi ekenin jetkizdi.