Japon mıllıarderi Iýsaký Maezava Ilon Masktyń SpaceX reısimen Aıdy aınalyp ótýge 8 adam izdeıtinin jarıalady.

"Men ártúrli tektegi adamdardyń qosylýyn qalaımyn" dedi ol Tvıtter paraqshasynda. Maezava sonymen qatar qosymsha málimetter siltemesin bólisti.

Ol búkil shyǵyndy tóleıtinin, sondyqtan bortqa kelgender aqysyz ushatynyn aıtty.

"DearMoon" dep atalatyn mısıa 2023 jyly ǵaryshqa attanady dep josparlanǵan.

Ótinish berýshiler eki krıterııge saı bolýy kerek: olar "basqa adamdarǵa jáne qoǵamǵa qandaı-da bir jolmen kómektesý" úshin "qandaı da bir qyzmetti" damytýǵa úles qosýy kerek jáne "basqa ekıpaj múshelerin qoldaýǵa daıyn bolýǵa tıis" dedi Maezava.

"Men barlyq oryndardy satyp aldym, sondyqtan bul jeke sapar bolady" dep qosty ol.

Sán salasynyń magnaty jáne óner týyndylaryn jınaýshy Maezava budan buryn "Starship" zymyranymen saıahatqa óner adamdaryn shaqyrýdy josparlap otyrǵanyn aıtqan.

"Aıǵa baratyn tegin bıletke ıe bolyńyz!! Ekıpajǵa 8 adam kerek. Búgin jazylyńyz!" dep jazylǵan mıllıarderdiń Tvıtter paraqshasynda. Saparǵa úmitker bolǵyńyz kelse, siltemege ótip, tirkelýge bolady.