Shyńjandaǵy adam quqyǵy problemalary úshin AQSH, EO, Ulybrıtanıa, Kanada bıligi Qytaı sheneýnikterine qarsy sanksıalardy bastady.

Dúısenbide AQSH, EO, Ulybrıtanıa jáne Kanada Shyńjańdaǵy adam quqyǵynyń aýyr dárejede buzylǵanyn málimdedi.

"Halyqaralyq aıyptaýlar kúsheıgenine qaramastan Qytaı Shyńjańda genosıd pen adamzatqa qarsy qylmystardy jalǵastyryp jatyr" dedi osy aptada Brússelde Eýropalyq Odaq jáne NATO-nyń resmı tulǵalarymen kezdesetin AQSH memlekettik hatshysy Antonıı Blınken. 

"Bul is-sharalar adam quqyqtaryn qurmetteýdi alǵa jyljytý úshin bizdi kópjaqty jumys isteýge jeteleıdi jáne Qytaı úkimeti men Qytaı komýnıstik partıasyndaǵy osy qatygezdikke jaýapty adamdarǵa qysym jasaý boıynsha bizdiń turaqty ustanymymyzdy kórsetedi" dedi ol.

EO aldymen óz sanksıalaryn jarıalap, Shyńjańdaǵy tórt sheneýnik pen bir uıymnyń atyn atady. Bul odaqtyń 1989 jyly Tánanmen alańyndaǵy qandy repressıadan keıin qytaılyq sheneýnikterge baǵyttalǵan alǵashqy sanksıasy.

Aqparatqa sáıkes, Eýropalyq Odaq, Ulybrıtanıa, Kanada jáne AQSH sanksıalary Qytaıdyń mıllıondaǵan uıǵyr, qazaq jáne basqa da etnıkalyq azshylyqtardy qaıta tárbıeleý lagerlerine qamaǵany úshin salynyp otyr. "Bul Shyńjań aımaǵynda adam quqyǵynyń buzylýyna jaýap" dep habarlady Batys BAQ-tary.

Alaıda, Beıjiń bul lagerler kásiptik oqytý ortalyǵy jáne terorızmmen kúresý kúshteriniń bóligi ekenin aıtady.

–Shyńjańdaǵy adam quqyqtarynyń jappaı buzylýynyń dálelderin, sonyń ishinde jappaı qamaý men baqylaý, azaptaý jáne májbúrli abort týraly habarlardy eskermeýge bolmaıdy,– dedi
Ulybrıtanıanyń syrtqy ister mınıstri Domınık Raab. Ol  Qytaıdyń Shyńjańdaǵy az ulttarǵa degen qarym-qatynasy týraly "ekinshi dúnıejúzilik soǵystan keıingi etnıkalyq jáne dinı topty jappaı ustaý" dep málimdedi.

Al, AQSH ókili "Biz búkil álemdegi odaqtastarymyzben birge QHR-dyń qylmystaryn tez arada toqtatýǵa jáne kóptegen qurbandar úshin ádilettilikke shaqyramyz" dedi.