Jeke turǵynúı salý maqsatyndaǵy jerler máselesin memlekettik-jekemenshik seriktestik arqyly sheshý kerek. Bul týraly jer reformasy jónindegi komısıa otyrysy kezinde komısıa múshesi, zańger Baqytjan Bazarbek aıtty.
Zańgerdiń aıtýynsha, turǵynúı salý maqsatyndaǵy jer ýchaskeleriniń kezeginde 1 jarym mln adam tur. Másele sheshilmese, munyń arty áleýmettik aýytqýǵa ákelip soǵýy múmkin.
Komısıa múshesi jer kodeksiniń 44-babyna sáıkes mundaı ýchaskeler ınjenerlik qurylymy júrgizilgen alqaptardan berilýi kerektigi aıtylǵanyn, mundaı ınjenerlik qurylymdy júrgizý úshin úkimette qarjy joq ekenine nazar aýdardy.
– Injenerlik qurylymmen qamtylǵan alqaptar keminde elektr jáne sý jelisimen qamtylýy kerek. Biraq mundaı aqsha memlekette joq. Sondyqtan jer kodeksiniń jańa redaksıasynda memlekettik-jekemenshik seriktestik negizinde jeke bıznesti ınjenerlik jelilerdi tartýǵa jumyldyrý jaǵyn oılastyrý kerek. Sol arqyly jer berýdi jyldamdatyp, kezekti jyljyta alamyz. Sonda azamattar jer reformasy júrip jatqanyn sezedi, – dedi ol.
Komısıa tóraǵasy, premer-mınıstrdiń orynbasary Eraly Toǵjanov bastama óte oryndy ekenin aıtyp, usynys qarastyrylatynyn jetkizdi.
Jer kodeksi boıynsha Qazaqstan azamattary jeke turǵynúı qurylysyna arnalǵan 10 sotyq jer ýchaskesin tegin alýǵa quqyly. Jer ýchaskesi ózge jyljymaıtyn múliktiń baryna qaramastan beriledi. Biraq azamattar jer ýchaskesiniń kezegi múlde jyljymaıtyn jıi aıtady.
Pikir qaldyrý