Elordada ótip jatqan jer reformasy jónindegi komısıa otyrysynda jıynǵa qatysýshy sheneýnikterdiń biri kózin jumyp otyrǵany vıdeoǵa túsip qaldy.
Kadrdan Qazaqstan fermerler qaýymdastyǵynyń tóraǵasy Jıgýlı Daırabaev sóz alǵanda onyń artynda otyrǵan adamnyń kózi jumýly otyrǵanyn, ara-arasynda ǵana kózi ashylyp, keıin qaıta jumylyp kete beretinin kórýge bolady.
Artynsha vıdeodan kózi jumýly adamdy janyndaǵylar túrtkeni, ol basyn shaıqaǵany, artynsha qolyn kóterip, kerilgeni kórinedi.
Ázirge sheneýniktiń aty-jóni, jıynda qalǵyp-múlgip otyrdy ma, álde tyńdaǵanda kózin jumyp otyratyn ádeti bar ma, ol jaǵy belgisiz.
Sheneýniktiń kózi jumylyp otyrǵan sátti vıdeonyń 27 mınýtynan bastap kórýge bolady.
Qazaqstanda jıynǵa qatysyp otyrǵan sheneýnikterdiń kózi jumylyp ketetin jaǵdaılar buǵan deıin de kezdesken. Eks-depýtattar Qýanysh Sultanov pen Vladıslav Kosarev sondaı jaǵdaıǵa tap bolǵandardyń biri.
Pikir qaldyrý