Búgin aýylsharýashylyǵy mınıstrliginde ótken jer reformasy jónindegi komısıa otyrysynda komısıa múshesi, qoǵam belsendisi Muhtar Taıjan birneshe usynys jasady.

Komısıa múshesiniń aıtýynsha, jerdi sheteldiktermen qatar Qazaqstan azamattaryna da jekemenshikke satýǵa tyıym salý qajet.

Sondaı-aq ol jerdiń ashyq kadastrin ornatý qajettigine nazar aýdaryp, jerdi kim jaldap otyrǵanyn halyq bilýi kerek ekenin, mundaı aqparat ashyq bolýǵa tıistigin atap ótti.

Qoǵam belsendisi usynystarynyń qatarynda ár aýyldyń mańaıyndaǵy jaıylym jerlerin memleket menshigine qaıtarý, bos jatqan jerlerdi kosmomonıtrıng arqyly memleketke qaıtarý, jerdi bólý men berý prosesin sıfrlandyrý, ashyq qylý sekildi bastamalar bar. Onyń pikirinshe, jer bólý máselesine  budan bylaı ákimder aralaspaýy kerek.

– Halqymyzdyń teń jartysy aýylda turady. Kez kelgen aýylǵa barsańyz, jaıylym jerler joqtyń qasy. Barlyǵy derlik jer jeke bireýlerdiń menshiginde. Sony memleket óz menshigine qaıtarýy kerek. Búginde jer komıtetiniń kúshi álsiz. Olar ákimderdiń aıtqanynan asa almaıdy. Aýyldyń, meıli aýdannyń basshysy bolsyn, jerdi ózderi bólip beredi. Bul durys emes. Jer tek agentikte bolýy kerek. Olar tikeleı basshylyqqa baǵynýǵa tıis. Sol kezde jer máselesi sheshiledi, – dedi ol. 

Muhtar Taıjan sońǵy usynysynda, eldiń mıllıondaǵan jerleri sheteldik bankte kepilde turǵanyn, munyń úlken problema ekenin aıtyp, memleket olarmen kelisim-shartty buzyp, óz menshigine qaıtarýy kerek dedi.