Jyl basynan bergi úsh aıda Almatyda 13 myńnan astam naýqas koronavırýs juqtyrǵan. 2020 jyl 18 myń naýqastan koronavırýs anyqtalǵan bolatyn. Sondaı-aq qalada mýtasıalanǵan shtamdar anyqtalýyna baılanysty Almaty qalasynyń ákimdigi turǵyndardy qaýipsizdik sharalaryn kúsheıtýge shaqyrady.

Ótken táýlikte 450 qala turǵynynan vırýs anyqtalǵan. Almaty qalasynyń sanıtarlyq-epıdemıologıalyq baqylaý departamentiniń málimeti boıynsha, turǵyndar arasynda ınfeksıa ósýiniń qarqyny artyp, brıtanıalyq jáne ońtústik afrıkalyq koronavırýs shtammdary baıqalǵan.

Jańa shtamdardyń juqpalylyǵy aldyńǵy bazalyq shtammen salystyrǵanda 70%-ǵa joǵary. Al koronavırýstyń sımptomsyz formalarynyń tirkelýi tómendegen. Bul kórsetkish 2020 jyly jalpy vırýs juqtyrǵandardyń 39%-yn qurasa, 2021 jyly 32%-ǵa deıin tómendegen.

Bıylǵy jyldyń naýryz aıynyń 3 aptasynda koronavırýs ınfeksıasyn kóp juqtyrǵandardyń 38%-y 20-39 jas aralyǵyndaǵy azamattar, 27%-y 40-59 jastaǵy, 20%-y 60 jastan asqan azamattar.

Taldaý nátıjeleri boıynsha, naýryz aıynyń 3 aptasynda naýqastardyń 42 paıyzy vırýsty qoǵamdyq oryndarǵa barǵanda (saýda, qoǵamdyq tamaqtaný), 18 paıyzy qoǵamdyq kólikpen júrgende, 2 paıyzy otbasylyq jaǵdaılarda, qalǵandary ózge jaǵdaılarda juqtyrǵan.

Qalada qalyptasqan epıdemıologıalyq jaǵdaıǵa baılanysty Almaty qalasynyń ákimdigi azamattardy maska rejımin, áleýmettik araqashyqtyqty saqtaýǵa, qoǵamdyq oryndarǵa barýdan aýlaq bolýǵa jáne adam kóp jınalýyn boldyrmaýǵa shaqyrady.