Qazaqstanda alǵash ret pedagogterge "Qazaqstannyń eńbek sińirgen ustazy" memlekettik nagradasy berildi. Bul týraly bilim jáne ǵylym mınıstrliginiń baspasóz qyzmeti habarlady.

Vedomstvo málimetinshe, 20-dan astam muǵalim bilim berý salasyna sińirgen eńbegi úshin memlekettik marapatqa ıe bolǵan. Bilim jáne ǵylym mınıstri Asqat Aımaǵambetov pedagogterge memlekettik nagradany tabys etip, olarǵa alǵys bildirdi.

– Pedagogterge memleket tarapynan erekshe kóńil bólinip jatyr. Memleket basshysynyń tapsyrmasy boıynsha alǵash ret "Qazaqstannyń eńbek sińirgen ustazy" memlekettik nagradasy taǵaıyndaldy. Eńbekterińiz ben óskeleń urpaqty tárbıeleýge qosqan úlesterińiz úshin alǵys aıtamyn. Nagradalaryńyz qutty bolsyn! Sizderge myqty densaýlyq, otbasylaryńyzǵa amandyq, baq-bereke tileımin, – dedi Aımaǵambetov.

"Qazaqstannyń eńbek sińirgen ustazy" memlekettik nagradasy muǵalimderge úzdik jetistikteri men memleket aldyndaǵy erekshe eńbegi úshin beriledi. Joǵary ataqqa ıe bolǵan pedagog 1 000 AEK (2 mln 917 myń tg) mólsherinde birjolǵy tólem alady" delingen habarlamada.