AQSH prezıdenti Djo Baıden telefon arqyly Ulybrıtanıa premer-mınıstri Borıs Djonsonmen sóılesip, Qytaıdyń "Bir beldeý, bir jol" jobasymen básekeles bolatyn aýqymdy ınfraqurylymdyq jospar bolýy kerek ekenin aıtty.

AQSH prezıdenti Ulybrıtanıa premer-mınıstrine shalǵan ekinshi qońyraýynda Beıjińniń jobasy Qytaıdyń ekonomıkalyq jáne saıası yqpalyn edáýir kúsheıtetinine alańdaýshylyq bildirdi.

– Men demokratıalyq memleketterdiń qoldaýyna muqtaj dúnıejúzilik qoǵamdastyqtarǵa kómektesetin osyndaı bastama kóterýimiz kerek dep usyndym, – dedi Baıden jýrnalıserge.

Bir beldeý, bir jol jobasyn 2013 jyly Qytaı tóraǵasy Sı Szınpın bastaǵan. Bul Shyǵys Azıadan Eýropaǵa deıin sozylatyn damý jáne ınvestısıalyq bastamalardy qamtıtyn birneshe trıllıon dollarlyq ınfraqurylymdyq sqema.

Buǵan deıin Baıden óziniń alǵashqy tolyq baspasóz brıfıńinde álem "tórtinshi ónerkásiptik revolúsıadan" ótip jatqanyn jáne Beıjiń jahandyq ústemdikti ornatqysy keletinin aıtqan.

– Men Qytaımen qatań básekelestikti kórip otyrmyn. Olar álemdegi jetekshi el, álemdegi eń baı memleket jáne álemdegi eń qýatty memleket bolýy úshin jalpy maqsat qoıǵan. Meniń kezimde bulaı bolmaıdy, – dep málimdedi ol.

Baıden osy aptada AQSH-tyń ınfraqurylymyn jańartýdyń birneshe trıllıondyq josparyn jarıalamaqshy.

Vashıngton kvanttyq esepteý, jasandy ıntellekt jáne bıotehnologıa sıaqty jańa tehnologıalar ınvestısıalarynyń kóbeıýin qamtamasyz etetinin málimdedi.

AQSH-tyń burynǵy prezıdenti Donald Tramp ta Qytaıdyń "Bir beldeý, bir jol" bastamasyna qarsy jumys isteıtinin aıtqan. Alaıda sońǵy birneshe jylda Latyn Amerıkasyndaǵy onnan astam el men Karıb teńizindegi 10 el Qytaıdyń jobasyna qosylyp úlgerdi.

Oǵan qosa, Shyǵys jáne Ońtústik Eýropadaǵy NATO-ǵa múshe elderdiń barlyǵy derlik Beıjińniń jobasymen birlestikter qurdy.

Refinitiv derekqorynyń málimetteri boıynsha, ótken jyldyń ortasyna qaraı 3,7 trıllıon dollar turatyn 2600-den astam joba "Bir jol, bir beldeýmen" baılanysty bolǵan.