"Juldyz kemeniń ushý synaǵy erteń tústen keıin bolýy múmkin" dep habarlady Spacex kompanıanyń negizin qalaýshy Ilon Mask 12 saǵat buryn óziniń Twitter paraqshasynda.

Juldyz kemeniń SN11 dep atalatyn sońǵy nusqasynyń synaǵy áýelde 15 naýryzdan bastalatyn aptaǵa josparlanǵan bolatyn, biraq SpaceX kompanıasy tekserý barysynda synaqty keshiktirdi.

26 naýryzdaǵy statıkalyq otaldyrý synaǵynan keıin Mask SN11 aspanǵa kóterilmes buryn "qosymsha tekserýler" qajet ekenin málimdedi.

Statıkalyq otaldyrý synaǵy bolǵan kezde zymyran jerde qozǵalmaı turyp barlyq qozǵaltqyshtarynan órt shyqqany baıqaldy.

Mask synaq kezinde qandaı problemalar týyndaǵanyn egjeı-tegjeıli túsindirmedi, biraq Twitter paraqshasynda juldyz kemeniń SN11 nusqasy dúısenbige deıin qaıta daıyn bolatynyn aıtty.

"Qosymsha tekserýler qajet. Jerge qonýǵa jáne tolyq qalpyna kelýge bar kúshimizdi salamyz" dep jazdy Mask.

Degenmen juldyz keme ushyrylatyn Boka Chıka polıgony ornalasqan Kameron okrýginde osy aptada jol jabylatyny týraly áli eshqandaı habarlama jasaǵan joq.

Burynǵy SN8, SN9 jáne SN10 juldyz kemeleri 10 mınýttaı aspanǵa kóterilip, birneshe manevrden keıin qonýǵa tyrysqan. Biraq SN8 jáne SN9 qonatyn kezde jarylyp ketse, SN10 juldyz kemesi jerge sátti qonǵannan birneshe mınýttan keıin jarylǵan..

Tesla jáne SpaceX kompanıasynyń bas atqarýshy dırektory Ilon Mask osyndaı juldyz kemelermen kelesi on jyldyń ishinde Marsqa adamdardy jetkizetinin aıtady. Onyń sózinshe, 1000 juldyz kemesi bolady jáne onyń árbiri 100 adam alyp júre alady. 2050 jylǵa deıin Qyzyl ǵalamsharda qala salynyp, onda bir mıllıon adam ómir súretin bolady. 

Synaqtan ótkizilip jatqan juldyz keme Marsqa ǵana emes, Aıǵa ushatyn mısıalarǵa da qoldanylmaq.

Jaqynda japon mıllıarderi Iýsaký Maezava juldyz kememen Aıdy aınalyp ótýge 8 adam izdeıtinin jarıalady.

Ilon Masktyń aıtýynsha, juldyz keme adamdardy Jersharynyń kez kelgen núktesine tez jetkizýge de qoldanylady. Onyń sózine sensek, adamdar juldyz kememen Nú-Iorktan Tokıoǵa jarty saǵatta jete alady. Sapardyń quny komersıalyq ushaqtardaǵy bıznesklass pen ekonomklastyń arasynda bolýy yqtımal.