Nur-Sultan qalasyndaǵy "Shapaǵat" bazarynan órt shyqty. Bul týraly qalalyq tótenshe jaǵdaılar departamentiniń baspasóz qyzmeti habarlady.

Departament málimetinshe, 2 sáýir saǵat 22:30-da órt sóndirýshilerge Saryarqa aýdany Bógenbaı batyr dańǵyly 69 mekenjaıynda ornalasqan Shapaǵat bazary órtenip jatqany týraly habar túsken.

"Órt sóndirýshiler jetkende, 50 sharshy metr aýmaqta shatyr men qaptamanyń órtenip jatqany anyqtaldy.

Ǵımarat ishi órtenbegen. Zardap shegýshiler men qaza bolǵandar joq. Jedel shtaby quryldy. Órt ornyna qalalyq tótenshe jaǵdaılar departamentiniń 8 birlik tehnıkasy men jeke quramnyń 32 adamy jumyldyrylǵan" delingen habarlamada.

Departament málimetinshe, saǵat 23:15-te órt tolyq aýyzdyqtalǵan.