Prezıdent Qasym-Jomart Toqaev qazaqstandyqtardy Ramazan aıynyń bastalýymen quttyqtady. Bul týraly Aqorda saıty habarlady.

Toqaev quttyqtaýynda Ramazan aıy kúlli musylman qaýymy úshin rýhanı turǵydan jańarý kezeńi ekeni aıtylǵan.

"Oraza aıynda ózara syılastyq pen meıirim, izgilik pen keshirim sıaqty asyl qasıetter dáripteledi. Jurt kómekke muqtaj jandarǵa qol ushyn berip, qaıyrymdylyq kórsetýge, saýapty is atqarýǵa umtylady" dep jazdy prezıdent.

Onyń aıtýynsha, bıyl da Ramazan aıy kúrdeli kezeńde ótpek.

"Islam dininiń osyndaı myzǵymas rýhanı qundylyqtary men jasampazdyq áleýeti qoǵamymyzdaǵy birlik pen yntymaqty odan ári nyǵaıtýǵa yqpal etedi. Ókinishke qaraı, bıyl da Ramazan aıy kúrdeli kezeńde ótetin boldy. Juqpaly dertti aýyzdyqtaý úshin barlyq sharalar jasalýda. Elimizdegi musylman jamaǵatyn qaýipsizdik talaptaryn saqtaýǵa, Qazaqstan musylmandary dinı basqarmasynyń usynymdaryn múltiksiz oryndaýǵa shaqyramyn.

Biz bul synaqty aýyzbirshilik pen jaýapkershiliktiń arqasynda eńseretinimiz sózsiz. Tutqan orazalaryńyz qabyl bolsyn! Elimizge amandyq, ár shańyraqqa baq-bereke tileımin!" delingen prezıdent quttyqtaýynda.