Búgin parlament májilisiniń jalpy otyrysynda ""Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrý engizý týraly" zań jobasy ekinshi oqylymda maquldandy. 

Zań jobasynyń maqsaty – sheteldik jer paıdalanýshylardyń, Qazaqstan Respýblıkasynyń sheteldik qatysýy bar zańdy tulǵalarynyń, sondaı-aq qandastardyń aýyl sharýashylyǵy maqsatyndaǵy jer ýchaskelerin jeke menshik quqyǵymen jáne jer paıdalaný quqyǵymen ıelenýine tyıym salýdy engizý.

Depýtattar zań jobasyna túzetýler engizdi. Oǵan saı, sheteldik azamattar men zańdy tulǵalar, sheteldik qatysý úlesi bar birlesken kásiporyndar zańdy tulǵa qatysýshylarynyń quramyna kirgen jaǵdaıda, sondaı-aq zańdy tulǵa qatysýshysynyń Qazaqstan Respýblıkasynyń azamattyǵy toqtatylǵan kezde aýyl sharýashylyǵy jerlerin ıelikten shyǵarý rásimderi kózdelgen.

Zań jobasy ekinshi oqylymda maquldanyp, senatynyń qaraýyna joldandy.