Alash kósemi Álıhan Bókeıhannyń esimin Almatydaǵy ázirge aty joq Qazaq ulttyq agrarlyq ýnıversıtetine berý kerek. Bul týraly májilistiń jalpy otyrysynda depýtat Qazybek Isa aıtty.

– "Aq jol" fraksıasy bıyl 3 naýryzda "Alash qaıratkerlerin umyt qaldyrý - saıası ádiletsizdik" atty depýtattyq saýal joldaǵany belgili. Onda óńirlerdegi Alash qaıratkerleriniń esimderi umyt qalyp otyrǵany aıtylǵan edi. Endi anyqtalǵandaı, eleýsiz qalǵandar tek Alash qaıratkerleri ǵana emes, Álıhan Bókeıhan, Ahmet Baıtursynuly, Mirjaqyp Dýlatuly sekildi Alash kósemderiniń ózderi de laıyqty ulyqtalmaı jatqanyna kóz jetkizdik. Bıyl Orta Azıadaǵy tuńǵysh saıası partıa "Alash" partıasyn quryp, Alash Orda úkimetin basqarǵan Álıhan Bókeıhannyń týǵanyna 155 jyl tolýyna arnalǵan is-sharalar Qazaqstan prezıdenti Qasym-Jomart Toqaevtyń usynýymen táýelsizdiktiń 30 jyldyǵy baǵdarlamasyna engizildi. Taıaýda 31 naýryzda Túrkistan deklarasıasyn qabyldaǵan túrki keńesi memleketteriniń basshylary Turannyń uly tulǵalarynyń ishinde Álıhan Bókeıhannyń 155 jyldyq mereıtoıyn da birlese atap ótýge sheshim qabyldady. Qaraǵandydaǵy Oktábr aýdany endi Álıhan aýdanyna aınaldy, – dedi ol.

Depýtattyń aıtýynsha, qalalardaǵy boıynda birde-bir oqý-mádenı oryndary joq bul kóshelerdiń barlyǵyn Álıhannyń kóshesi dep elge kórsetýdiń ózi uıat.

– Degenmen, elimizde Alash kóseminiń atyna laıyq eshqandaı kóshe joq ekenin anyqtadyq. Astanamyzdan bastasaq, Bókeıhanov kóshesi ortalyqta emes, eleýsiz ol kósheni kóbinese "Máńgilik el" kóshesindegi keptelisten qashqan júrgizýshiler jaqsy biledi. Almatydaǵy Bókeıhanov kóshesi qala shetindegi óndiristik aýdandaǵy bazar artyndaǵy qýysta ornalasqan. Shymkenttiń shetindegi Tassaı aýylynyń tasasynda qalǵan Bókeıhanov kóshesiniń uzyndyǵy 500 metrdeı ǵana, jıyrma shaqty úı ornalasqan, tipti jaryq ta joq. Alash Ordasy atalǵan Semeıde de, oblys ortalyǵy Óskemende de Álıhanǵa laıyqty kóshe joq, shalǵaıdaǵy shaǵyn aýdandardaǵy jıyrma shaqty úıden turatyn shaǵyn kósheler. Qalalardaǵy boıynda birde-bir oqý-mádenı oryndary joq bul kóshelerdiń barlyǵyn Álıhannyń kóshesi dep elge kórsetýdiń ózi uıat. Qazaq elinde birtýar tulǵamyzdyń atyna laıyq kóshe bolmaýy jáne qazaq aýylsharýashylyǵynyń basynda turǵan ǵulama, ǵalymǵa birde-bir joǵary oqý ornynyń aty berilmeýi – Alash kóseminiń arýaǵyna jasalǵan qıanat, – dedi ol.

Sonymen qatar Qazybek Isa "Aq jol" partıasynyń usynysyn jetkizdi.

– Á.Bókeıhannyń negizgi mamandyǵy – ormantanýshy-ǵalym, ıaǵnı agronom. Ol – qazaqtyń jer-sýyn, dástúrli sharýashylyǵyn zerttegen ekspedısıalarǵa qatysyp, qoı, iri qara jáne jylqy tuqymdaryn zerttep, 3 irgeli ǵylymı monografıa, ondaǵan ǵylymı maqala jazǵan, qazaq aýylsharýashylyǵy ǵylymynyń negizin qalaǵan ǵulama ǵalym. Sondyqtan onyń esimin Almatydaǵy ázirge aty joq Qazaq ulttyq agrarlyq ýnıversıtetine berý ábden laıyqty dep sanaımyz.

Ekinshi, elordamyzdaǵy Turan men Syǵanaq kósheleriniń qıylysyndaǵy bos turǵan alańǵa "Alash" aleıasyn ashyp, Álıhan eskertkishi men Alash qaıratkerleri bústerin ornatý qajet.

Úshinshi, elimizdegi barlyq qala ortalyǵynan Álıhan Bókeıhan atyna laıyqty kóshe berilip, Alash alańdary ashylýy tıis, – dedi depýtat.