Almatylyqtar COVID-19-ǵa qarsy vaksına alýǵa shaqyrady jáne ekpe saldyrǵannan keıingi áserlerin bólisýdi jalǵastyrýda.

Elimizdiń iri megapolısinde turǵyndardy jappaı vaksınalaý júrip jatyr. Ekpe salynatyn 200-den astam pýnkt kelýshilerdi qabyldaýda. Vaksınalaý pýnktteriniń bir bóligi OSO men bazarlardyń bazasynda ashylǵan. Ekpe saldyrǵan Almaty turǵyndary bul qadamǵa ne úshin barǵandaryn, prosedýranyń qalaı ótkenin jáne qazir ózderin qalaı sezinetinderin aıtýda.

 Koronavırýsqa qarsy vaksına alýǵa elektrondy jazylý 8 sáýirde bastaldy. Ekpe saldyrý úshin qalalyq emhanalar bazasyndaǵy pýnktterdiń birine aptanyń kez kelgen kúni saǵat 8.00 men 20.00 aralyǵynda jazylýǵa bolady. Koronavırýstan vaksınalaý eki kezeńde ótedi. Aldymen birinshi ıneksıany saldyrý qajet, 21 kúnnen keıin ekinshisin alýǵa bolady. Ekpe alýǵa jazylǵandardyń bárine SMS jiberiledi, onda qaı kúni jáne qaı ýaqytta ekpe alatyny kórsetiledi. Vaksınany 18 jáne odan joǵary jastaǵy adamdar ala alady.

Egý pýnktterinde bilikti medısına qyzmetkerleri kezekshilik atqarady. Sonymen birge, medısınalyq joǵary oqý oryndary men kolejderdiń oqytýshylarynan quralǵan eriktiler de qyzmet etedi.

Vaksına alýǵa kelgen almatylyqtar óz tájirıbelerimen bólisýde jáne ekpeniń qanshalyqty paıdaly ekenin aıtýda.

Ekpe alǵandar arasynda QR densaýlyq saqtaý mınıstrliginiń ardageri, ómiriniń 55 jylyn medısınaǵa arnaǵan Zınaıda Sevrúkova da bar.

«Men koronavırýstan ekpe alýǵa sanaly túrde keldim. Bul ınfeksıa óte qaýipti, sondyqtan árbir adam óziniń jáne jaqyndarynyń ómiri úshin vaksına alýy kerek. Sonda ǵana biz ujymdyq ımýnıtet qalyptastyramyz, al bul ınfeksıanyń aldyn alady, taralýyna jol bermeıdi, eń qalypty ómirimizge oralýǵa yqpal etedi», - dedi medısına ardageri Z. Sevrúkova.

Almaty turǵyny Alshynbaı Núsipbaev ta osyndaı pikirde. «Men ekpeni jubaıymmen birge aldym. Sebebi jaqyndarymyzdyń, balalarymyzdyń densaýlyǵy úshin alańdaımyz. Infeksıany juqtyrmaýdyń birden bir joly – ekpe alý», - dedi qala turǵyny.

Qala turǵyny Andreı Bogdanov da vırýsty tek vaksınalaý arqyly jeńýge bolatynyn jáne óziniń ekpe alǵanyn aıtty.

«Vırýsty juqtyryp, qatty aýyrǵan tanystarym da, týystarym da kóp. Men ekpe saldyrýǵa arnaıy keldim, ımýnıtetti arttyratyn da, koronavırýsty jeńetin de vaksınalaný», - dep esepteıdi A. Bogdanov.

Vaksınalanǵan almatylyqtar áleýmettik jelilerde jıi pikirler qaldyrýda. Mysaly, ınstagram jelisin qoldanýshy @asel.abd postynda vaksınalaýdyń birinshi kezeńinen ótkenin jáne ózin jaqsy sezinetinin jazǵan.

«Bul meniń tańdaýym jáne men tek ózimdi ǵana emes, aınalamdaǵy, ásirese, týǵan-týystarym men jaqyndarymnyń densaýlyǵyna qaýip tóndirmeıtinime senimdimin», - dep jazypty jelide @asel.abd.

Voronınder otbasy úshin vaksınalaýdyń mańyzdy ekenin Ksenıa Voronına Feısbýkte jarıalady. Ol «Meniń ájemniń jasy 74-te. Búgin ol óz erkimen Almatydaǵy emhanada ekpe aldy» dep jazdy.

Dárigerler vaksınalanǵan qala turǵyndaryna ekpe alǵannan keıin úsh kún boıy ózińdi qalaı ustaý kerektigi aıtylǵan jadynamalar beredi.