Belsendi, halyqaralyq sholýshy Qýanysh Edilhantegi óziniń Facebook paraqshasynda Qytaı bıliginiń Shyńjańdaǵy etnıkalyq qazaqtarǵa kórsetip otyrǵan qysymyna jaýap retinde azamattyq qoǵamdy 2022 jyly Beıjińde ótetin qysqy Olımpıada oıyndaryna boıkot jarıalaýǵa shaqyrdy.
Sholýshy "AQSH memlekettik departamentiniń basshysy Entonı Blınken aldaǵy Olımpıada oıyndaryna AQSH boıkot jarıalaýy múmkin ekenin aıtýy Qazaqstanǵa berilgen ym, ıshara ispettes" degen pikirde.
"Birinshiden, sondaı joǵary deńgeıdegi basshy jaıdan-jaı ym jasamaıdy, ol onyń statýsyna saı emes jáne sport saıasattan tys degen halyqaralyq jazylmaǵan zańdy elemeýshilik bolyp tabylady. Endeshe ondaı oıdy memleket basshylary emes, azamattyq qoǵam ókilderi kótergeni qısyndy bolmaq.
Ekinshiden, Qytaı ekspansıasynan shyn qorlyq kórip otyrǵan qaı el? Shyńjańdaǵy qazaqtardy genosıdke ushyratyp otyrǵan Qytaı saıasatynan japa shegip otyrǵan bizdiń el emes pe? Qytaı elshiliginiń aldynda nesheme kúnderden beri adamdaryn bosatýdy surap zarlaǵan analardyń daýsyn estı tura elshilikten bir adam shyǵyp jaýap bermeýin qalaı túsinýge bolady? Bul tek astamshylyq qana emes, tipti eshqandaı moralǵa syımaıtyn, adamgershilikten jurdaı, naǵyz ıttik qoı? Soǵan shydap ún qatpaı otyrǵan bizdiń memleketti qazaqqa janashyr memleket deýge kimniń aýzy barady? Talaı qorlyqty qazaqpen birdeı kórip kele jatqan uıǵyrda tipti memleket te joq. Endeshe bizder, azamattyq qoǵam ókilderi, nege osy máseleni kótermeımiz? Inısıatıva tómennen bastalǵany durys emes pe?" degen ol Beıjińde ótkeli otyrǵan qysqy Olımpıada oıyndaryna boıkot jarıalaýǵa úndedi.
Belsendi "muny (boıkotty - red.) AQSH qoldasa, basqalary da qosylady dep oılaımyn, bul Qytaıǵa abyroı ákele qoımas. Eń bolmaǵanda óshimizdi solaı alsaq? Báribir basqasha qolymyzdan ne keledi?" deıdi.
Qýanysh Edilhantegi osy Olımpıadany ótkizýge 2014 jyly Almaty men Beıjiń daýysqa túsip, Qytaı astanasy tórt daýyspen jeńip shyqqanyn, Polsha, Ýkraına, Norvegıa, Shvesıa sekildi ózge kandıdattar qarjylyq shyǵyndy eskerip, úmitkerligin qaıtyp alǵanyn aıtady. Al Shveısarıa, Ispanıa, Germanıa elderi referendým ótkizip, halqy qarsy shyqqan soń kandıdatýralarynan bas tartqan.
Belsendi aqtyq kezeńge deıin barǵan eki avtorıtarlyq el úkimetiniń oıyna referendým ótkizip, halqynan suraý kelmegenine ashynady.
"Tipti basqalar olardy ádeıi arandatyp, artynan jorta jarys jolynan shyǵyp qaldy ma, kim bilipti? Qalaı bolǵanda da bizdi qudaı saqtapty, áıtpese naǵyz korrýpsıanyń kókesi, aqsha jeý osy kezderde júrip jatar edi" deıdi sholýshy.
Oqı otyryńyz:
Pikir qaldyrý