Konstıtýsıalyq keńes prezıdent Q.Toqaevtyń advokattyq qyzmetke baılanysty jańa zańdy el konstıtýsıasyna sáıkestigi turǵysynan qaraý týraly ótinishin qabyldady. Bul týraly konstıtýsıalyq keńestiń resmı saıty habarlady.

"Respýblıkanyń Konstıtýsıalyq Keńesi Qazaqstan respýblıkasynyń prezıdenti Q. K. Toqaevtyń 2021 jylǵy 8 sáýirde parlament qabyldaǵan "Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańyn Qazaqstan Respýblıkasynyń Konstıtýsıasyna sáıkestigi turǵysynan qaraý týraly ótinishin konstıtýsıalyq is júrgizýge qabyldady.

"Qazaqstan Respýblıkasynyń Konstıtýsıalyq Keńesi týraly" Konstıtýsıalyq zańǵa sáıkes Konstıtýsıalyq Keńestiń otyrysyna materıaldar daıyndaý jónindegi jumys bastaldy, onda atalǵan ótinish máni boıynsha qaralatyn bolady.

Konstıtýsıalyq Keńes Reglamentiniń 5-2-tarmaǵyna sáıkes atalǵan máselelerge mamandanǵan quqyq qorǵaý, ǵylymı jáne ózge de uıymdar men azamattar Konstıtýsıalyq Keńeske óz qorytyndylaryn e-mail: gulmira@ksrk.gov.kz joldaı alady" delingen aqparattyq habarlamada.