Izraıldegi evreı-palestın qaqtyǵysy órshı túsip, Tel-Avıv qalasy mańyndaǵy Lod qalasynda tótenshe jaǵdaı jarıalandy, dep jazady BBC.

BUU Gaza sektoryndaǵy palestınalyq sodyrlar men Izraıl áskerı kúshteri arasyndaǵy qaqtyǵys saldarynan ólim-jitimniń kóbeıgenine alańdaýshylyq bildirip, janjaldyń "jappaı soǵysqa" ulasyp ketýinen qaýiptenedi.

Qaqtyǵys Izraıl polısıasy men Ierýsalımdegi palestınalyq demonstranttar arasyndaǵy birneshe aptaǵa sozylǵan shıelenisten týyndaǵan. Demonstranttardyń alańǵa shyǵýyna birneshe arab otbasy Ierýsalımnen kóshirilýi múmkin degen aqparat sebep bolǵan. Palestına evreıler men musylmandar úshin de qasıetti jer.

Izraıl bıliginiń málimetinshe, Palestına sodyrlary 38 saǵat ishinde, negizinen Tel-Avıvke 1000-nan astam zymyran atqan. Seısenbide Izraıl tarapynan jaýap retinde áýe soqqysy jasalyp, nátıjesinde Gazada eki kóp páterli úı qıraǵan. HAMAS uıymy (Gazany basqaratyn sodyrlardyń toby) jaýdyń turǵyn úı munaralaryna shabýyldaǵanyna ashýlanǵanyn málimdegen.

BUU Bas hatshysy Antonıý Gýterrısh Izraıldegi zorlyq-zombylyqqa alańdaýshylyq bildirip, eki tarapty tynyshtyqty qalpyna keltirýge kúsh salýǵa shaqyrdy.

Izraıl densaýlyq saqtaý mınıstrligi dúısenbiden bastap Gaza sektorynda kem degende 43 palestınalyq, onyń ishinde 13 bala qaza tapqanyn habarlady.

AQSH memlekettik departamentiniń ókili Ned Praıs Izraıldiń ózin qorǵaýǵa quqyǵy bar ekenin, biraq Palestına halqynyń da qaýipsizdikke quqyǵy baryn aıtty.