Qazan qalasynda bolǵan oqıǵadan keıin Bilim jáne ǵylym mınıstri Asqat Aımaǵambetov mektep basshylaryna tapsyrma berdi. Bul týraly ol vedomstvonyń apparat jınalysynda aıtty.

– Ata-analar balalaryn balabaqshaǵa álde mektepke jibergende alańdamaýy kerek. Tezirek qaýipsizdik sharalary qabyldanyp, oqýshylarǵa jaıly orta qalyptastyrýymyz qajet. Ol úshin tıisti jumysty uıymdastyrý kerek. Qazan qalasynda bolǵan jantúrshigerlik oqıǵa bárimizdiń qabyrǵamyzdy qaıystyrdy. Bul biz úshin úlken sabaq bolýǵa tıis. Biz bilim salasynda keshendi, júıeli is-sharalar qabyldaýymyz kerek. Bul baǵyt boıynsha prezıdent tapsyrma berdi. Sondyqtan "dabyl" túımelerin, beınebaqylaý júıelerin ornatýymyz kerek. Onyń ishinde ortalyqtandyrylǵan polısıa beketterin qoıyp arnaıy kúzet bolýǵa tıis, – dedi mınıstr. 

Aımaǵambetov mekteptiń árbir qyzmetkeri men oqýshysy tótenshe jaǵdaı kezinde ózin qalaı ustaý qajettigin bilýge tıis ekenin atap ótti.

– Bul úshin oqý-jattyǵý ótkizý qajet. Biz qazir tıisti nusqaýlyqtarǵa mindetti normalardy engizip jatyrmyz. Bilim uıymdaryn atestattaý kezinde oqý baǵdarlamasy, bilim sapasyna ǵana emes, mekteptiń qanshalyqty qaýipsiz ekenine de nazar aýdaramyz. Mektep bitirgen bala óz mektebine qarýmen barý degen ol, eń aldymen, tárbıe jumysyna qoıylatyn suraq. Eń aldymen, bilim mazmunyna, bilim baǵdarlamasyna qoıylatyn suraq. Sondyqtan biz kúzet, psıholog, beınebaqylaý, dabyl túımeleri dep qana otyrmaı, tárbıe jumysyn da jandandyrýymyz kerek. Eń basty másele – qundylyqtarǵa negizdelgen bilim berý, – dedi ol.

Eske sala keteıik, Tatarstan astanasy Qazan qalasyndaǵy mektepke 19 jastaǵy jasóspirim qarýmen shabýyl jasap, sonyń saldarynan eki muǵalim, jeti oqýshy qaza taýyp, 21 adam jaraqat alǵan.

Kúlikti kinásin tolyǵymen moıyndaǵan. Ol "adam óltirý" faktisi boıynsha aıyptalýda.