Qytaı sońǵy halyq sanaǵy týý kórsetkishteri tómen ekenin kórsetkennen keıin dúnıege úshinshi bala ákelýge ruhsat etetinin málim etti. Mundaı qadamdy saıası búro otyrysynda el tóraǵasy Sı Szınpın maquldaǵan, dep jazady VVS.
Sınhýa agenttigi jańa saıasat aıasynda ulttyq qartaıý prosesiniń aldyn alýdy kózdeıtin qosymsha sharalar qabyldanatynyn habarlady.
2016 jyly Qytaı 1979 jyldan beri qoldanylǵan "bir otbasy – bir bala" saıasatynan bas tartyp, ekinshi balany týýǵa ruhsat etken. Alaıda jańa saıasat kútkendegideı nátıje bermegen.
Sarapshylar búginde úlken januıany qalaıtyn jastardyń óte az ekenin, baýyrsyz ósken, shaǵyn otbasyǵa úırenip qalǵan qytaılyqtardyń tutas býyny qalyptasqanyn aıtady. Jastar otbasylyq tabysty birneshe bala arasynda bólgenshe, bir balaǵa barynsha nazar aýdarýdy qup kóredi.
Commerzbank sarapshysy Hao Chjoý Reuters-ke bildirgen pikirinde "jastar ary ketse eki bala ǵana ósirgisi keledi, máseleniń túp-sebebi ómir súrý quny tym qymbat, al ómirlik qysym asa joǵary bolýynda" degen.
Qytaıdaǵy sońǵy halyq sanaǵy 2020 jyly 12 mıllıon sábı dúnıege kelgenin kórsetken. 2016 jyly 18 mıllıon náreste jaryq dúnıe esigin ashqan bolatyn. Sońǵy kórsetkish 1960 jyldan beri tirkelgen eń tómengi kórsetkish boldy.
Medıa-analıtık Kerrı Allenniń sózinshe, Qytaıda eńbek naryǵynyń qysqarýynan jastardyń kóbirek jumys isteýi qalypty jaǵdaıǵa aınalǵan. Sondaı-aq erte juptasýǵa qaraǵanda, bilim alý men jumysty jalǵastyrýdy qalaıtyn áıelder de kóbeıe túsken.
Pikir qaldyrý