Fılosofıa ǵylymynyń doktory, profesor, pedagog, saıası ǵylymdar jáne zań ǵylymdary akademıalarynyń akademıgi Saǵadı Baıuzaquly Bólekbaev dúnıeden ozdy. Qaraly habardy týraly Ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúlteti Fılosofıa kafedrasy jetkizdi.
Saǵadı Bólekbaev oıshyl-fılosof Aǵyn Qasymjanovtyń izbasary bolǵan. Ol jarty ǵasyrǵa jýyq ǵumyryn ǵylym men ustazdyqqa arnaǵan.
Saǵadı Bólekbaev ár jyldary QR BǴM-niń ulttyq sarapshysy, Qazaqstan halqy assambleıasynyń keńesshisi, QR Mádenıet mınıstrligi Din isteri jónindegi komıteti sarapshylar keńesiniń múshesi, Almaty qalasyndaǵy aqparattyq-taldaý ortalyǵynyń múshesi, "Ádilet" partıasy tóraǵasynyń orynbasary, QR ǴK Fılosofıa, saıasattaný jáne dintaný ınstıtýtynyń ǵylymı jobalarynyń sarapshysy, birneshe dısertasıalyq keńesterdiń múshesi, "Ortalyq Azıa ýnıversıteti Habarshysy", "Mádenıetter dıalogy" aqparattyq-taldaý jýrnaldarynyń bas redaktory, "D.A. Qonaev atyndaǵy Zań ýnıversıteti Habarshysynyń", Reseılik "SOTIS" federaldyq ǵylymı-praktıkalyq jýrnalynyń redaksıalyq alqasynyń múshesi syndy ǵylymı jáne qoǵamdyq-saıası qyzmetterdi atqarǵan.
Saǵadı Baıuzaqulynyń fılosofıa tarıhy, áleýmettik fılosofıa, halyqaralyq qatynastar, túrik halyqtarynyń tarıhy men mádenıeti, logıka, ekonomıka jáne memleket máseleleri, sana fılosofıasyna qatysty zertteýleri oqyrmanǵa etene tanys jáne úlken suranysqa ıe.
Ǵalym kóptegen kitaptar men birneshe oqýlyqtardyń, 250-den astam ǵylymı maqalanyń avtory bolǵan. Onyń 50-den astam ǵylymı eńbegi Chehıa, Polsha, Nıderlandy, Germanıa, Pákistan, Reseı, Ýkraına, Ózbekstan, Túrkmenstan, Qyrǵyzstan, Ázerbaıjan jáne t.b. elderde jarıalanǵan.
Pikir qaldyrý