Májilis spıkeri Nurlan Nyǵmatýlın densaýlyq saqtaý mınıstri Alekseı Soıdy halyqqa jaqyn bolýǵa shaqyrdy. Bul týraly ol májilistiń plenarlyq otyrysynda aıtty. 

Májilis tóraǵasy Alekseı Soıǵa aýdandyq emhanalarǵa baryp, kezekte otyrǵan halyqpen tildesýge úndedi.  

– Mınıstr myrza halyqqa shyǵatyn kez keldi. Sanıtarlyq dárigerdiń nusqaýlyǵy arqyly adamdarmen sóılesýdi toqtatyńyz. Aýrýhanaǵa, emhanaǵa baryńyz. Ásirese, aýdandyq medısınalyq uıymdardy aralyp shyǵyńyz, ondaǵy kezekte turǵan adamdardy tyńdańyz. Meniń oıymsha, sol kezde medısınalyq kómek sapasy men osy kórsetkishke qol jetkizý jaıynda qajetti málimet alasyz. Jalpy óz jumysyńyz jaıynda halyqtyń pikirin estısiz. Sizdiń barlyq kórsetkishterińiz qanaǵattandyrmaıdy, – dedi Nurlan Nyǵmatýlın

Spıkerdiń sózinshe mınıstrlikke úkimet tarapynan tıisti qoldaý men qarajat bólinip jatyr. Sondyqtan  naǵyz jumysqa  kirisetin ýaqyt keldi. 

– Siz taǵy da óz statısıkańyzǵa, eýropalyq ádisnamaǵa silteme jasaı bastaısyz. İndetke baılanysty densaýlyq saqtaý mınıstrligine salmaq túsip turǵanyn túsinemiz. Biraq biraz ýaqyt ótti, jınalý kerek. Esepti paraqtan nemese sýflermen oqyp ǵana shektelesiz, alaıda jýrnalıserdiń qanshama suraǵy jaýapsyz qalýda. Baryńyz adamdarmen sóılesińiz, biz kim úshin jumys isteımiz? Saılaýshylarymyz medısına sapasyn qalaı baǵalaıtynyn bilý kerek. Úkimet sizdi qoldap keledi, tıisti qarajat ta bólinýde. Endi jumys isteıtin ýaqyt keldi, – dedi Nyǵmatýlın.