Premer-mınıstr Asqar Mamınniń tóraǵalyǵymen ótken Úkimettiń selektorlyq otyrysynda qurylys materıaldaryna baǵa belgileý máselesi qaraldy, dep jazady úkimettiń baspasóz qyzmeti.

Ulttyq statısıka búrosynyń derekteri boıynsha 2021 jylǵy qańtar-mamyr aılarynda bastapqy turǵyn úı baǵasy 8%-ǵa, ekinshi qaıtalama turǵyn úı baǵasy 13%-ǵa ósken. Otandyq qurylys materıaldary baǵasynyń ósimi bıylǵy qańtar-sáýirde 16% quraǵan.

Úkimet ishki naryq 50 paıyzyn ǵana qamtamasyz etetin armatýra, shyny sıaqty ımportqa táýeldi materıaldar baǵasynyń asa kóp ósýin elektr energıasynyń, janar-jaǵarmaı men magıstraldyq temirjol jelisi qyzmetiniń qymbattaýymen baılanystyrady.

Sondaı-aq turǵyn-úıge suranystyń artýy da qymbatshylyqqa áser etken. Ulttyq statısıka búrosynyń derekteri boıynsha jyl basynan beri jasalǵan kelisimder sany ótken jylǵymen salystyrǵanda 2,5 esege artqan.

– Qurylystyń joǵary qarqyny qurylystaǵy barlyq shyǵyndardyń úlesi shamamen 50%-dy quraıtyn qurylys materıaldaryna qajettilikti ulǵaıtady. Osyǵan oraı baǵanyń negizsiz ósýine jol bermeý jáne naryqta qatań baqylaýdy qamtamasyz etý boıynsha shuǵyl sharalar qabyldaý óte mańyzdy, – degen Asqar Mamın Básekelestikti qorǵaý jáne damytý agenttigine Indýstrıa jáne ınfraqurylymdyq damý mınıstrligimen jáne ákimdiktermen birlesip, josyqsyz óndirýshiler men ónimdi jetkizýshilerge qatysty qatań sharalar qabyldaýdy tapsyrdy.

"Premer-mınıstr Indýstrıa jáne ınfraqurylymdyq damý mınıstrligine «Atameken» UKP-men birlesip, qurylys salýshylar men qurylys materıaldaryn óndirýshiler arasynda uzaq merzimdi satyp alý kelisimsharttaryn jasaý múmkindigin pysyqtaýdy tapsyrdy. Indýstrıa jáne ınfraqurylymdyq damý mınıstrligine ákimdiktermen jáne "Atameken" UKP-men birlesip, qurylys salasynda ımport almastyrý boıynsha josparlanǵan jobalardy ýaqytynda iske qosýdy qamtamasyz etý tapsyryldy" delingen aqparattyq habarlamada.

Qazaqstanda sońǵy eki-úsh aptada qurylys materıaldary, onyń ishinde temir, sement baǵasy aıtarlyqtaı qymbattaǵan. Qymbatshylyq ózge de taýarlarǵa áser etip, qurylys naryǵyndaǵy kóptegen taýar túrleriniń baǵasy ósken bolatyn.