Sońǵy bes jylda elde balalarǵa qarsy seksýaldyq sıpattaǵy 3893 qylmys tirkelgen. Bul týraly májilis depýtaty Baqytbek Smaǵul İshki ister mınıstri Erlan Turǵymbaev pen bilim jáne ǵylym mınıstri Asqat Aımaǵambetovke joldaǵan depýtattyq saýalynda málim etti.

Depýtat dereginshe, 2016 jyldan beri 748 zorlaý, seksýaldyq sıpattaǵy 672 zorlyq-zombylyq áreketteri, on alty jasqa tolmaǵan adammen jynystyq qatynas nemese seksýaldyq sıpattaǵy 1808 áreket tirkelgen.  2020 jyldyń qorytyndysy boıynsha zorlaý faktisi 2016 jylmen salystyrǵanda 45,8 paıyzǵa artqan.

"Bárinen buryn, bundaı qylmys jasaǵan adamdardyń bostandyqqa shyǵyp, qaıta osyndaı qylmys jasaýy qoǵamda, jalpy árbir adamda alańdatýshylyq týdyrady. Buqaralyq aqparat quraldarynda bıylǵy jyldyń sońyna deıin "32 pedofıl bostandyqqa shyǵady" degen aqparat tarady. Bul rette, jazasyn ótep jatqan qylmyskerlermen qylmystyq-atqarý mekemelerinde qanshalyqty tıisti jumystar júrgizildi jáne bizdiń probasıalyq qyzmet bul sanattaǵy adamdarmen jumys isteýge qanshalyqty daıyn degen suraqtar týyndaıdy.

Ózderińizge málim, qylmystyq-atqarý ınspeksıalarynyń ornyna probasıa qyzmetteri quryldy, olardyń negizgi fýnksıalarynyń biri sottalǵandardy túzep-tárbıeleýge yqpal etý. Ókinishke oraı, olar áli kúnge deıin eski tásildermen jumys isteıdi, bul qyzmette formalızm kóp.

Osyǵan baılanysty,  qurmetti Erlan Zamanbekuly, joǵaryda baıandalǵan máseleni qatań baqylaýǵa alýyńyzdy jáne kelesi suraqtarǵa jaýap berýińizdi suraımyn:

- qylmystyq-atqarý júıesiniń mekemelerinde osy qylmys boıynsha jazasyn óteýshilermen ońaltý jumystaryn júrgizý boıynsha arnaıy baǵdarlamalar qabyldandy ma, tıisti mamandar bar ma?

- sottalǵandar arasynda tárbıe jáne ıdeologıalyq jumysta qandaı tásilderdi paıdalanasyzdar?

- túzeý mekemelerindegi psıhologıalyq qyzmet júıesiniń deńgeıin arttyrý boıynsha qandaı sharalar qabyldandy, oǵan jylyna qansha qarajat bólinedi?

- sottalǵandardy eńbekpen qamtýda qandaı jańa tásilder engizildi?

Qurmetti Asqat Qanatuly, bilim jáne ǵylym mınıstrligi:

- aýyldy jerlerdegi dalada ornalasqan mektep dárethanalaryn ǵımaratqa engizý boıynsha qandaı sharalar qabyldady, búgingi tańda bul baǵyttaǵy jumys qalaı júrgizilip jatyr, jalpy daladaǵy mektep dárethanalary joıyldy ma? 

- qaýipsizdikti qamtamasyz etý maqsatynda bilim berý uıymdarynda mektep ınspektorlary jetkilikti me jáne olarǵa jeke kabınet bólinip beınebaqylaý kameralarymen tolyq jabdyqtaldy ma?

- bilim berý uıymdarynda psıhologıalyq qyzmettiń jumysy qandaı deńgeıde?" degen depýtat mınıstrlerge saýaldy qaraý nátıjesi boıynsha zańmen belgilengen merzimde jazbasha jaýap berýin surady.