1 maýsymdaǵy jaǵdaı boıynsha Biryńǵaı jınaqtaýshy zeınetaqy qory salymshylarynyń shottarynda 12,7 trıllıon teńge zeınetaqy jınaǵy bar. Bul týraly qordyń baspasóz qyzmeti habarlady.

2020 jyldyń 1 maýsymynan bastap 2021 jyldyń 1 maýsymyna deıin zeınetaqy jınaqtarynyń somasy 1 trln asa teńgege ( 9%) ósken.

Zeınetaqy jınaqtarynyń negizgi somasy mindetti zeınetaqy jarnalary (MZJ) esebinen jınaqtaldy, onyń mólsheri 12,4 trln teńge (sońǵy 12 aı ishindegi ósim – 9%). Mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 326,1 mlrd teńge (ósim 18%), al erikti zeınetaqy jarnalary (EZJ) boıynsha zeınetaqy jınaqtarynyń somasy 2,2 mlrd teńgege (ósim 4%) jetti.

2021 jyldyń bes aıynda BJZQ salymshylary ótken jyldyń sáıkes kezeńimen salystyrǵanda kóbirek qarajat salǵan. 2021 jylǵy 1 maýsymdaǵy jaǵdaı boıynsha salymshylardyń shottaryna jalpy kólemi shamamen 665,6 mlrd teńge zeınetaqy jarnalary aýdarylǵan, bul 2020 jyldyń sáıkes kezeńindegi kórsetkishten 236,7 mlrd teńgege nemese 55%-ǵa asyp tústi. Jarnalardyń jalpy kóleminiń 95,5%-yn BJZQ-ǵa MZJ boıynsha túsimder quraıdy, olardyń somasy – 491,5 mlrd teńge (sońǵy 12 aı ishindegi ósim 20%), MKZJ boıynsha 22,9 mlrd teńge (ósim 14%) tústi, EZJ boıynsha 241 mln teńge (ósim 80%) aýdaryldy.

Zeınetaqy jınaqtarynyń aıtarlyqtaı ósýi, salymshylar salymynan bólek, 2021 jylǵy 1 qańtar men 1 maýsym aralyǵynda 654,2 mlrd teńgeni quraǵan taza ınvestısıalyq tabys arqasynda bolǵan. Ol ótken jyldyń sáıkes kezeńindegi kórsetkishten 31% nemese 155 mlrd teńgege artyq.

Qazaqstan Respýblıkasy Ulttyq bankiniń basqarýyndaǵy BJZQ zeınetaqy aktıvteri boıynsha kiristilik jyl basynan bastap 1 maýsymǵa 5,3% bolsa, ınflásıa 3,5% qurady. Sońǵy 12 aıdaǵy kiristilik 11,7%, osy kezeńdegi ınflásıa 7,2% boldy.

2021 jylǵy 1 maýsymdaǵy jaǵdaı boıynsha BJZQ-daǵy jeke zeınetaqy shottarynyń sany 11,6 mln birlikti qurady. Shottardyń eń kóp sany mindetti zeınetaqy jarnalary (MZJ) boıynsha ashyldy, olardyń sany – 10 900 756. Odan ári MKZJ esebinen qalyptasqan shottar – 523 624, BJZQ-daǵy EZJ esebinen qalyptasqan shottar sany qazir 45 143 birlikke teń.

Jyl basynan beri BJZQ salymshylaryna 1,5 trln teńgeden astam tólem jasaldy. Tólemderdiń 1,4 trln teńge kólemindegi basym bóligin birjolǵy zeınetaqy tólemderi (BZT) qurady. Jas mólsheri boıynsha tólemder ekinshi orynda – 37,4 mlrd teńge. Odan ári saqtandyrý uıymdaryna aýdarymdar shamamen 33,8 mlrd teńgeni, muragerlik boıynsha tólemder 26,3 mlrd teńgeni, QR sheginen tys TTJ ketýge baılanysty tólemder 13,4 mlrd teńgeni, jerleýge berilgen tólemder 2,1 mlrd teńgeni jáne múgedektik boıynsha tólemder 0,9 mlrd teńgeni quraǵan.

Keste boıynsha aı saıynǵy ortasha tólem somasy (zeınet jasyna tolýyna baılanysty) 28 780 teńgeni, al aı saıynǵy tólemniń eń joǵary somasy 522 610 teńgeni qurady. Bul rette, aǵymdaǵy jyly salymshyǵa keste boıynsha berilgen MZJ, MKZJ jáne EZJ-nyń jıyntyq tólemi 558 954,53 teńge boldy.