Vıse-mınıstr, úsh sýdıa, birneshe ákim jáne men olardyń orynbasarlary  jemqorlyq faktisimen ustalǵan. Bul týraly sybaılas jemqorlyqqa qarsy qyzmet basshysy Marat Ahmetjanov 6 aıdaǵy kórsetkishterdi málim etý barysynda aıtty.

– Jedel-tergeý jumysy aıasynda 6 aıda 658 adam qylmystyq jaýapkershilikke tartyldy, olardyń 61-i respýblıkalyq jáne oblystyq deńgeıdegi basshy, onyń ishinde vıse-mınıstr jáne úsh sýdıa bar. 7 óńirlik ákim men olardyń orynbasarlary áshkerelendi. Basshylardyń jaýapkershiligin kúsheıtý úshin 33 laýazymdy tulǵa jazalandy, olardyń úsheýi jumystan shyǵaryldy. Búdjetke 15 mıllıard teńge qaıtaryldy. Bıznes isterine zańsyz aralasýdyń 60 jaǵdaıy jáne kóleńkeli ekonomıka sýbektilerine "qamqorlyq jasaýdyń" 45 deregi tirkeldi. Júıeli sybaılas jemqorlyqtyń 61 faktisi anyqtaldy, – dedi Marat Ahmetjanov. 

Sonymen qatar "Semeı ormany" rezervatynyń bas dırektory jáne onyń eki orynbasary bastaǵan qylmystyq top qyzmeti toqtatylǵan. Qazirgi ýaqytta barlyq úsh basshy qamaýǵa alynyp, tergeý júrip jatyr.