Oflaın oqýǵa oralý barlyq sanıtarlyq-epıdemıologıalyq talaptardy qatań saqtaı otyryp oryndalýy tıis. Bul týraly "Nur Otan" partıasy janyndaǵy Bilim men ǵylymdy damytý jónindegi respýblıkalyq qoǵamdyq keńes otyrsynda keńes tóraǵasy, parlament májilisiniń depýtaty Juldyz Súleımenova málim etti, dep jazady partıanyń baspasóz qyzmeti.

Májilis barysynda bas sanıtarlyq dáriger Erlan Qıasov habarlaǵandaı, pedagogtar men qyzmetkerler 100% vaksınalanǵanda ǵana mektepter dástúrli oqytý formatyna kóshe alady.

– Mektepterdegi saqtyq sharalary buqaralyq is-sharalardy ótkizýge tyıym salýdy, synyptardy bólýdi jáne ártúrli synyptar úshin úzilis ýaqytyn bólýdi, asqanada tamaqtaný barysyna baqylaýdy kúsheıtýdi qamtıdy. Joǵary oqý oryndaryna kelsek, 18 jastan asqan stýdentter de vaksınalanýy nemese qashyqtan oqytýǵa aýystyrylýy tıis, – dedi Erlan Qıasov.

Keńes múshesi, "Respýblıkalyq fızıka-matematıka mektebi" KEAQ basqarma tóraǵasy Ǵabıt Bekahmetov oqýshylardy bastaýysh, orta jáne joǵary mektep bloktaryna bólýdi usyndy. Koronavırýs anyqtalǵan jaǵdaıda, karantınge búkil mektep emes, naqty blok jabylady.

Bilim jáne ǵylym vıse-mınıstri Sholpan Karınova 1 qyrkúıekten bastap elde 7 475 mektepti ashý josparlanyp otyrǵanyn jetkizdi.

Qazaqstanda "Delta shtammynyń" taralýy saldarynan sońǵy eki aptada aldyńǵy eki aptamen salystyrǵanda respýblıka boıynsha barlyq óńirlerde aýrýǵa shaldyǵý deńgeıi 1,9 ese ósken. "Delta" shtammynyń juqpalylyǵy joǵary jáne anyqtalǵan shtamdarǵa qaraǵanda 60% juqpaly, orta eseppen 1 adamnan 5-6 adamǵa juǵady.

Sońǵy derek boıynsha elde bir táýlikte 2909 adamnan koronavırýs, 140 adamnan koronavırýs belgileri bar pnevmonıa anyqtalǵan. Bir táýlikte 32 adam koronavırýstan, 5 adam pnevmonıadan qaıtys bolǵan.