Epıdemıologıalyq jaǵdaıdyń nasharlaýyna jáne COVID-19-dyń taralýy ósýine baılanysty Nur-Sultanda taǵy bir qalalyq aýrýhana ınfeksıalyq stasıonarǵa aınaldy. Bul týraly qala ákimdiginiń resmı saıty habarlady.

Resmı saıt taratqan aqparatqa sáıkes, №1 Kópbeıindi qalalyq aýrýhana 9 shildeden bastap koronavırýs ınfeksıasy bar pasıentterdi qabyldaıdy. Onda 600 tósek-oryn ornalastyrylǵan. áBul shara tósek-oryndarynyń jetkiliksiz bolýy sebepti qabyldandyá dep túsindirdi qalalyq Qoǵamdyq densaýlyq saqtaý basqarmasy.

– Ókinishke qoraı, biz taǵy bir qalalyq aýrýhanada josparly gospıtalızasıany toqtatýǵa, ony kovıdtik stasıonarǵa aınaldyrýǵa májbúr bolyp otyrmyz. Sebebi ınfeksıa juqtyrǵandar sany azaımaı tur. Barlyq pasıent aýystyryldy. Aldaǵy ýaqytta olardy qalanyń respýblıkalyq jáne vedimistik klınıkalaryna jiberemiz, – dedi qalalyq Qoǵamdyq densaýlyq saqtaý basqarmasynyń basshysy Tımýr Muratov.

Qala turǵyndaryn aýrýhanaǵa jatqyzý stasıonarlardyń kezekshiligine sáıkes júrgiziledi. Sondaı-aq, gınekologıadan bólek, táýlik boıy jáne kúndizgi stasıonarǵa josparly jatqyzý №2 Kópbeıindi qalalyq aýrýhana da ýaqytsha toqtalady.

Ótken jazda №1 Kópbeıindi qalalyq aýrýhana KVI naýqastaryn emdeıtin stasıonarǵa aýystyrylǵan bolatyn. Al tamyz aıynyń sońynda koronavırýs ınfeksıasy bar sońǵy naýqas shyǵarylǵan soń burynǵy profıldik jumysyna qaıta kirisken.

– Epıdemıologıalyq jaǵdaı nasharlap barady. Sońǵy aptada biz úsh aýrýhanany ınfeksıalyq stasıonarǵa aýystyrdyq. Qaladaǵy epıdemıologıalyq jaǵdaı týraly turǵyndardyń ınfeksıa joıyldy, karantındi umytýǵa bolady degen pikiri bizge aýyr tıedi. Elorda naýryz aıynan beri "qyzyl" aımaqtan shyqpaǵanyn taǵy da eske salyp óteıin. Bul kórsetkish turǵyndarymyzdyń sanıtarlyq talaptardy saqtaýdaǵy jaýapkershiligine tikeleı baılanysty, – dep atap ótti vedomstvo basshysy.

Tımýr Muratov táýligine aýrýhanaǵa jatqyzylǵandardyń sany 300 adamǵa jetkenin aıtty. Sózinshe, pasıentter aýyr jáne óte aýyr kúıde túsip jatyr.

Eske sala keteıik, ótken demalys kúnderi ınfeksıamen aýyrǵandardyń kóbeıýine baılanysty qalalyq psıhıkalyq densaýlyq ortalyǵy jáne qorǵanys mınıstrliginiń bas áskerı klınıkalyq gospıtali ınfeksıalyq stasıonarǵa aýystyrylǵan. Al jalpy tósek-oryn sany – 300.

Nur-Sultan qalasy boıynsha 9 shilde kúni ınfeksıalyq stasıonarlarda barlyǵy 2 007 naýqas jatyr, bul tósek júktemesiniń 81%-yn quraıdy.