Aqtóbedegi 7 jasar oqýshynyń týystary zorlyq-zombylyq týraly málimdegennen keıin mektep dırektory men dırektordyń orynbasary qyzmetinen bosatyldy. Bul týraly bilim jáne ǵylym mınıstrliginiń resmı saıty málimdedi.

BǴM Balalardyń quqyqtaryn qorǵaý Komıtetiniń tóraǵasy Esenǵazy Imanǵalıev pen QR Bilim jáne ǵylym mınıstriniń Balalardyń quqyqtaryn qorǵaý máseleleri jónindegi keńesshisi Raısa Sher Aqtóbe oblysyna baryp, zardap shekken balanyń otbasymen kezdesken.

Mınıstrlik ókilderi balanyń jaǵdaıymen tanysyp, bala men onyń týystaryna qandaı kómek qajet ekenin surap bilgen. Balaǵa jan-jaqty kómek, onyń ishinde psıhologıalyq kómek kórsetilmek.

– Aqtóbe oblysy ákimdigi bilim basqarmasy Bilim jáne ǵylym mınıstrligine oqýshy ata-anasynyń ótinishi týraly ýaqytyly habarlamady. Mektep ákimshiligi qajetti jumysty júrgizbeı, týystarynyń úndeýine tıisti nazar aýdarmaǵan. Ákimdikter janyndaǵy barlyq bilim basqarmasy mektepterde ne bolyp jatqanyn baqylaýda ustaýǵa jáne óńirlerde ne bolyp jatqanyn bilýge tıis. Mektepte ár bala úshin yńǵaıly bolatyn jaǵdaı jasaý kerek. Nemquraılylyqqa jol berilmeıdi, — dedi Balalar quqyǵyn qorǵaý Komıtetiniń tóraǵasy Esenǵazy Imanǵalıev.

Sondaı-aq BǴM ókilderi Aqtóbe oblysy ákiminiń orynbasary, Aqtóbe oblysy ákimdiginiń bilim basqarmasy basshylyǵy, quqyq qorǵaý organdary men qamqorshylyq keńesiniń qatysýymen keńes ótkizdi. Onda bolǵan oqıǵaǵa baılanysty jaǵdaı tolyq anyqtalǵanǵa deıin mektep dırektory men dırektordyń orynbasaryn qyzmetinen shettetý týraly sheshim qabyldady. 

Eske sala keteıik, Aqtóbede osydan tórt aı buryn 9-synyptyń tórt oqýshysy 7 jasar balaǵa qysym kórsetip, mektep ishindegi dárethanada zorlaǵany habarlanǵan.