Qazaqstannyń on eki óńiri koronavırýstyń taralý deńgeıi boıynsha "qyzyl" aımaqta. Bul týraly COVID-19 taralýyna jol bermeý jónindegi vedomstvoaralyq komısıa habarlady.

Koronavırýs ınfeksıasy boıynsha Qazaqstan óńirlerindegi epıdemıologıalyq ahýaldy baǵalaý matrısasyna sáıkes, Nur-Sultan, Almaty, Shymkent qalalary, Aqmola, Aqtóbe, Atyraý, Batys Qazaqstan, Qaraǵandy, Qostanaı, Mańǵystaý, Pavlodar jáne Soltústik Qazaqstan oblystary "qyzyl" aımaqta tur.

Almaty, Jambyl jáne Qyzylorda oblystary "sary" aımaqta ornalasqan.

Al "jasyl" aımaqta Túrkistan jáne Shyǵys Qazaqstan oblystary tur.

Qazaqstanda ótken táýlikte 4375 adamda koronavırýs indeti PTR arqyly rastaldy. 167 adam pnevmonıa juqtyrǵan.

12 shildedegi málimet boıynsha koronavırýstan 56 adam, pnevmonıadan úsh naýqas kóz jumǵan.

El boıynsha koronavırýsqa tapsyrǵan testi oń nátıje kórsetken jaǵdaılar sany 466 792-ge jetti. Onyń ishinde 4769 adam qaıtys bolǵan. Koronavırýs belgileri bar pnevmonıamen aýyrǵandardyń resmı sany – 58 086. Onyń 3504-i kóz jumǵan.

Vırýstyń taralýy ásirese Nur-Sultan (1128), Almaty (640), Shymkent (342) qalalarynda, Qaraǵandy (589), Atyraý (320), Batys Qazaqstan oblystarynda (187) órship tur.

14 shildedegi málimet boıynsha, 45 282 adam koronavırýs pen pnevmonıadan emdelip jatyr. Olardyń ishinde 14 698 pasıent stasıonarda, 30 584 naýqas ambýlatorıalyq deńgeıde em qabyldaýda.

İndetke shaldyqqandar arasynda 880 adamnyń jaǵdaıy aýyr, 198 pasıenttiń jaǵdaıy óte aýyr, 116 naýqas ÓJJ apparatynda jatyr.