Nur-Sultanda qoǵamdyq kólikte maska rejıminiń saqtalýy tekserildi.

CTS kólik kompanıasynyń mamandary avtobýstarǵa kirip, jolaýshylardyń betperde rejıminiń saqtalý-saqtalmaýyn qadaǵalady. Tekserýshiler maskasyn sheship otyrǵandarǵa jáne ony durys taqpaǵandarǵa eskertý jasap, elordadaǵy epıdemıologıalyq jaǵdaı men koronavırýs aýrýynyń ósýine baılanysty maska rejımin saqtaýdy surady. 

– Qazir reıdke jıi shyǵamyz. Ózderińiz bilesizder, karantınge baılanysty qoǵamdyq kólikke kirgen jolaýshylar mindetti túrde bet–perde erejesin saqtaýy kerek. Biraq keıbir jolaýshylar maska taqpaı kiredi. Sol sebepti avtobýsta júrgen kezde «betperde taǵyńyzdar» dep eskertemiz. Qazir maskaǵa qatysty jaı ǵana eskertý jasap júrmiz. Aıyppul salynyp jatqan joq. Jolaýshylardyń teń jartysy betperde taqsa, jartysy maskasyz nemese durys taqpaı otyrady. Al bizdi kóre sala jyldam taǵyp ala qoıady. Qazir qoǵamdyq kólikte dezınfeksıa júrgizilip turady. Degenmen maska taǵý aýrý juqtyrý qaýpin azaıtady. Adam kóp jınalatyn jerde barynsha qaýipsizdik saqtaǵan abzal, – dedi CTS kompanıasy kólik baqylaý departamentiniń menedjeri Altynaı Álishbekova.