Bilim jáne ǵylym mınıstri Asqat Aımaǵambetov jańa oqý jylynda oqýshylarǵa tek mektep formasyn ǵana emes, klasıkalyq stıldegi kıimdi de kıýge ruqsat berdi. Alaıda tiginshiler mınıstrdiń bul sheshimine narazy, dep habarlady KTK arnasy.

Tigin kásipornynyń jetekshisi Sergeı Sokırko mınıstrdiń bul málimdemesine tiginshiler tarapynan narazylyqtar týyndap jatqanyn jetkizdi.

– Kútip júrgenimiz múldem basqa jańalyq edi. Byltyr jeńil ónerkásiptegilerdiń jartysynda jumys toqtady. Endi bilim mınıstri bıyl qalǵanyn qurtaıyn dep otyr. Mıllıondaǵan aqshamyzǵa qanshama shıkizat satyp aldyq. Ótken jyly trıkotaj ben iskerlik kıimderdi tigip, áıteýir aman qalǵanbyz. Endi qaıtip kún kóremiz?!, –  deıdi Sergeı Sokırko.

3 tamyz kúni Asqat Aımaǵambetov facebook paraqshasynda jańa oqý jylynda balalarǵa klasıkalyq stıldegi kıim kıýge ruqsat beriletinin málimdegen.

Aımaǵambetovtyń aıtýynsha, qazirgi kezde dúkender belgili bir ýaqytta, al keıbir qalalarda jumys kúnderi ǵana isteıdi. Eger ata-analar balalarǵa mektep formasyn satyp alý úshin saýda ortalyqtary men dúkenderge jappaı baratyn bolsa, onda uzyn-sonar kezekter bolyp, Covid-19 juqtyrý qaýpi kúsheıedi. Sonymen qosa keıbir otbasylarǵa mektep formasyn satyp alý otbasylyq búdjetke qosymsha júkteme bolýy múmkin.