Shymkent qalasynyń ákimi Murat Áıtenovtiń tóraǵalyǵymen koronavırýs ınfeksıasyna qarsy qalalyq shtabtyń otyrysy ótti.

Jyl basynan beri qalada 25 myńǵa jýyq adamnan koronavırýs ınfeksıasy tirkelip, onyń ishinde búgingi kúnge deıin 16 myńnan astam naýqas jazylyp shyqqan. Jalpy ekpe naýqany bastalǵaly qaladaǵy 319 myńnan asa turǵyn vaksınanyń ekinshi komponentin qabyldaǵan.

Aıta keteıik, sońǵy aptada jedel medısınalyq kómekti shaqyrtý kórsetkishi tómendegen. Máselen, bir apta buryn jedel járdem qyzmetine bir kúnde 2275 shaqyrtý túsken bolsa, búgingi kúni táýligine 2048-di qurap otyr.

Al, mobıldik brıgadalar qyzmet kórsetken barlyq pasıentterge klınıkalyq hattama men algorıtmge sáıkes emdeý taǵaıyndalǵan. Bazıstik terapıa anamnezinde 5756 pasıenttiń jaǵdaıy jaqsarǵany baıqalǵan, bul ambýlatorıalyq baqylaýdaǵy barlyq pasıentterdiń 51,7% - yn quraıdy eken.

Otyrys sońynda jaýapty mamandardyń usynys, pikirlerin tyńdaǵan qala ákimi koronovırýstyq ınfeksıanyń taralýyna jol bermeý maqsatynda monıtorıńtik toptyń jumysyn jandandyrýdy sondaı-aq vaksınasıalaý jumystaryn júıeli júrgizý qajettiligi týraly aıtty.

Qazir dıspanserlik naýqastar tobyna jatatyn adamdardyń ishinde sozylmaly aýrýy bar naýqastardyń 54% vaksına alǵan. Ákim qaladaǵy ahýaldy nazarǵa alyp, vaksına alýǵa qarsy medısınalyq kórsetilim bolmaǵan jaǵdaıda sozylmaly aýrýy barlardy da vaksına saldyrýǵa shaqyrýdy aıtty.