Túrkistan oblysynda er adamnan 840 túp jáne 300-ge jýyq sirińke qorabyna salynǵan esirtki tárkilendi, dep habarlady Polisia.kz saıty.

Túrkistan oblysy polıseılerine Jetisaı aýdanynda jergilikti turǵynnyń biri ósirýge tyıym salynǵan ósimdikterdi egip-ósirýmen aınalysady degen habarlama túsken. Jetisaılyq polıseıler jan-jaqty tekserý jumystary nátıjesinde úıiniń aýlasynyń artqy jaǵynda esirtki tektes sora ósimdigin ósirgen jergilikti turǵyndy ustaǵan.

"Tártip saqshylary kúdiktiniń aýlasynan aıǵaq zat retinde 840 túp ósip turǵan esirtki zatyna uqsas jasyl tústi, hosh ıisti ósimdikti tárkiledi. Sonymen qatar turǵynnyń ýchaskesinen keptirip jaıyp qoıǵan taǵy da 289 dana sirińke qorabyna salynǵan esirtki zatyna uqsas jasyl tústi, hosh ıisti esirtki zatynyń japyraqtary alyndy. Jetisaı aýdandyq polısıa bóliminde atalǵan jaıt boıynsha QR QK-niń 300-baby 2-bóliginiń 3-tarmaǵyna saı (Quramynda esirtki zattar bar, ósirýge tyıym salynǵan iri mólsherdegi ósimdikterdi zańsyz egip-ósirý) tirkelip, tergep-tekserý áreketteri bastaldy. Sotqa deıingi tergep-tekserý barysynda aıǵaq zat retinde alynǵan esirtkige saraptama taǵaıyndaldy" delingen aqparattyq habarlamada.

Saraptama qorytyndysy boıynsha tárkilengen túpterdiń "sora", al sirińke qorabyndaǵy esirtki zatynyń "keptirilgen marıhýana" ekeni rastalǵan. Kúdikti er adam qamaýǵa alynǵan. İs boıynsha tergeý amaldary bastaldy.