Qazaqstan Respýblıkasy Syrtqy ister mınıstrliginiń baspasóz qyzmetiniń aqparattaryna súıensek, Saýd Arabıasynda ornalasqan Mekke mańyndaǵy Mına jazyǵynda oryn alǵan qaıǵyly oqıǵada qaza tapqandardyń arasynda qazaqstandyq qajylar bolǵan joq. Bul týraly «Qamshy» portaly habarlaıdy.
Atalmysh oqıǵaǵa baılanysty Saýd Arabıa bıligi qaıǵyly oqıǵanyń sebep-saldaryn anyqtaýǵa arnaıy joǵarǵy keńes qurǵan. Aıta keteıik, keshe qasıetti Mekke mańyndaǵy Mına jazyǵynda álemniń túkpir-túkpirinen jınalǵan 717 qajy qaza tapqan bolatyn. Ázirge belgili bolǵandaı, qaza tapqandar shaıtan qabyrǵasyna tas laqtyrý barysyndaǵy qarbalasta adamdardyń aıaq astyna taptalyp qalǵan.
Al Saýd Arabıasy Koróli Salman ben Abdel Azız Al Saýd qaza tapqandardyń otbasylaryna kóńil aıtty.
