AQSH áskeri Aýǵanstannan birjolata ketti. Bul týraly Bı-bı-sı aqparat agenttigi habarlady.

30 tamyz kúni Aýǵanstannan AQSH áskeri  men dıplomattar mingen sońǵy ushaq ushyp shyqty. 20 jyldaı aýǵan jerinde soǵysqan AQSH osy ýaqyt ishinde 2 myńnan astam jaýyngerinen aıyrylyp, myńdaǵan adamy jaraqat alǵan.

Amerıkalyqtar ketken bette Kabýl áýejaıyna tálipter baqylaý ornatty.

Osylaısha, AQSH Aýǵanstan Islam respýblıkasyndaǵy 20 jylǵa jýyq áskerı operasıasyn aıaqtady.

– Búgin AQSH-tyń C-17 ushaǵy Hamıd Karzaı aýejaıynnan birjolata ushyp ketti. Osylaısha Aýǵanstannan amerıkalyqtar men aýǵandyqtardy evakýasıalaý jumystary aıaqtaldy. Sonymen qatar AQSH mısıasynyń aıaqtalǵanyn da aıtqym keledi. Kabýldaǵy Hamıd Karzaı atyndaǵy áýejaı sheteldik kúshter baqylaýda ustaǵan sońǵy nysan bolatyn. Endi ol tálipterdiń enshisine tıdi, – dedi AQSH ortalyq qolbasshylyǵynyń basshysy Kennet Makenzı.

Osyǵan oraı tálipter aspanǵa oq atyp, Aýǵanstannyń tolyq táýelsizdikke qol jetkizgenin aıtyp, jar salýda.