“Baraholka” bazarynan taǵy da shý shyqty.  Qazaqstanǵa, tipti, ortalyq Azıaǵa tanymal, altyn-kúmis zergerlik buıymdaryn saýdalaıtyn bazardyń satýshylary bas kóterdi.Olaı etpeske shara qalmaǵan.  Bul týraly «Qamshy» portaly 31 arnaǵa silteme jasaı otyryp habarlaıdy.

Oqıǵa bylaı órbıdi. Baraholkanyń  “Altyn qatary” Soltústik aınalma jolynyń boıyndaǵy órtenbegen birneshe bazardyń biri. Biraq, órt qaýipsizdigi saqtalmaǵan eken. Osyǵan oraı tótenshe jaǵdaılar qyzmetkerleri eskertý jasap, bazar basshylaryn jaýapqa tartqan. Eskertýden keıin, kemshilikter túzetilip, jaǵdaıdy rettelse kerek.  Biraq keshe, ıaǵnı 25 qyrkúıekte jumysqa kelgen saýdagerlerdi sot oryndaýshylary kútip turdy.

“Bazar jabylady dep eskertken joq. Tańerteń jumysqa keldik. Shyǵyńdar dep qýalap mal sıaqty shyǵaryp jiberdi. Eshkim eskertken joq. Bazardyń arendasyn, salyǵyn tólep otyrmyz. Arendany úsh-aq kún boldy jınalǵanyna. Eshqandaı habar aıtylǵan joq”, – deıdi  saýdager Júsip Sýanov.

Bir top saýdager bazar basshylary týraly tek jaqsy pikir bildirýde. Jaýapqa tartylǵan “Altyn qatardyń” ákimshiligi bazardy jabý negizsiz deıdi. Aıtýlarynsha, saýda orny barlyq talapqa saı. Altyn-kúmisterin jıyp, bazar syrtyna toptasqan satýshylar birneshe aıdan beri zań oryndarynan baqylaý kúsheıtilgenin aıtady. Al sottyń sheshimin oryndaýǵa kelgen tulǵalar bazardy jabý týraly aldyn-ala eskertildi deıdi.